Kangiani qiterlermi eqqissisoqanngilaq
Israelimiut pissaaneqarnertik takutinniaannarlugu, Hamasimeersut nunanut allanut tunngasunut allaffeqarfiginikuusaat inuerunnikoq illorsuaq qaartippaat sequmillugu. Qaartartulli atorneqartup sakkortuup inuk ataaseq toquppaa 150-illu missaaniittut ikilerlugit. Israelimiut timmisartunik saassussimmata Hamasimeersut arlallit raketsinik igeriussassaminnik piareersaasut toquppaat, raketsilli 16-it Israelimut igeriunneqarmata biilit uninngasarfiannut torarput. Raketsilli igeriunneqartartut ulorianarsiartuinnarmata Buship tikeraarnera soqutiginagu Israelimiut Hamasimeersuinnarnuunngitsoq saassusseqattaarput, soorlu ullumi Al Aqsa martyrineersup nuimasup illua ungoriarlugu toquppaat. Al Aqsa martyrit Yassir Arafatimit pilersinneqarnikuugaluarput, ullumikkulli Arafatip kingoraartaanit Mahmud Abbasimit aqunneqaratik.
Israelip Gazamut aqqutit tamaasa ullumi matuaat, mannalu tikillugu biilit assartuutit 20-t Gazamut isersinnaajunnaarput. Naalagaaffiit peqatigiiffiat nalunaarpoq aqqusinernik matusineq Gazami inunnut 1,4 milliuuniusunut kinguneqarnerlussasoq, inuit amerlanerit USA-miit Europamiillu ikiuutinik nappateqarmata. Israelimiit nalunaarutigineqarpoq Hamasimeersut nukillaarsarniarlugit raketsinillu saassusseqattaarunnaarsinniarlugit qanoq iliuuseqartariaqaramik aqquserngit matullugit.
