Kangiani Illorsuassaq pillugu isumaqatigiipput

Qaasuitsup Kommuniata, Namminersorlutik Oqartussat aamma Realdaniap kangerluup sermip iigartarfillip Kangiata eqqaani, nunarsuarmi kingornussassanut UNESCO-p allattugaataanut ilanngunneqarsimasumi, Ilulissat avannaanni Kangiani Illorsuassaq pilersinneqartussaq pillugu suleqatigiinnissamik isumaqatigiissut atsioqqammerpaat.
Allattoq Karsten Sommer
juulip 15-at 2015 16:25
Nutserisoq Simon Uldum -

Kangiani Illorsuaq kangerlummut sermip iigartarfilimmut, aammalu Ilulissanut takornariat tikittagaattut assorsuaq neriunartortaqartitsissasoq nalilerneqarpoq. Ukiut tamaasa illorsuarmik tikeraat 17.000-it takusaasarnissaat naatsorsuutigineqarpoq. Aammattaaq nunat tamalaanit silap pissusianik ilisimatusartunut, naalagaaffinni siuttunut allanullu Ilulissanut tikeraarajuttartunut naapittarfittut atorneqassaaq.

Saniatigut anguniagaq tassaavoq Ilulissat takornarianut kajungernartuunerannik tapersersuisutut illunik titartaariaatsimik, saqqummersitanillu nunarsuarmi pitsaanerpaanut sanilliunneqarsinnaasunik atuilluni illup pilersinnissaa.

Taamaammat illunik titartaasartunik nunanit tamalaaneersunik unammisitsinermik aallartitsisoqaqqammerpoq, taamaaliornikkut illumik qaffasissumik pitsaassusilimmik pilersitsisoqarnissaa qulakkeerniarlugu.

Aamma atuaruk Sumiiffiit uku tallimat nunarsuarmioqatigiinnut eriagisassanngortinneqarsinnaapput

Aallaqqaataaniillu illunik titartaasartut nunani tamalaani suleqatigiittartut pingasut unammisitsinermut qaaqquneqarsimapput - tassalu Studio Olafur Eliasson Berlinimeersoq, Rintala Eggertsson Architects Oslomeersoq kiisalu japanimeersut Kengo Kuma and Associates Tokyomeersut Parisimeersullu.

Nunat tamalaani illunik titartaasartut unammisinnerannut peqataaniarluni nalunaarfissamut septembarip aallaqqaataa killissaritinneqarpoq, ajugaatinneqartorlu 2016-imi juunip qaammataani tamanut saqqummiunneqassaaq.

Inuussutissarsiornermut naalakkersuisup Vittus Qujaukitsup suliniut Nunap immikkoortuini tikeraarneqartarfissani arlaliusuni siullertut isigaa:

- Nunap immikkoortuini tikeraartarfiliornerit ukiamut Naalakkersuisut takornariartitsinermik periusissiamik saqqummiussinissamik anguniakkat pingaarutillit ilagaat. Avataanit aningaasaliisartut suleqatigalugit pisortat suliniutaannik annertuunik aallartisaasoqarsinnaaneranut Illorsuaq aamma kusanartumik takussutissaavoq, Vittus Qujaikitsoq taama oqarpoq.

Aamma atuaruk Politikerit illorsuarmut tapersiisut

Illorsuup sanaartornissaanut, saqqummersitsivissaq ilanngullugu, aningaasartuutit tamakkiisut 108 millionit koruuniussasut missiliuutigineqarpoq.

Realdania illorsuarmut  75 millionit koruuninik tapiissuteqarniarpoq, nunatta tungaanit 23 millionit koruuninik aningaasaleeqataasoqarnissaa piumasaqaatigineqarluni.