Kangia-Kitaata kommunissaani soraarsitsisoqarnianngilaq

- Kommunimi sulisut akornanni nutaanik unammillernartunik takkuttoqarumaarpoq, soraarsitsinissarli uani pineqanngilaq, Kangia Kitaani borgmesterinngortussap Asii Chemnitz Narup-ip ataasinngormat Nuup kommuneani sulisut pisortaaffigilerumaagassani oqalugiarfigigamigit ilaatigut taama oqarpoq.
juunip 04-at 2008 06:56

- Suliassarpassuit utaqqivaatigut, tamatsinnullu unammillernerussapput. Sungiusimasanut maleruutiinnalersimaneq peertariaqarparput, taamaammallu nukiit nutaat pisariaqartippavut, Asii Chemnitz Narup ilaatigut taama oqarpoq, nangillunilu erseqqissaatigaa kommunip iluani sullissinermi piffiit nutaat aggersut allannguutaajumaartullu piareersaleruttorini.

- Sulisut ilaat allanik suliakkerneqartalerumaarput, soraarsitsisoqarnianngilarli, Asii Chemnitz Narup oqarpoq.

Taassuma erseqqissaatigaa sulisut inissisimanerat isumannaatsuummat qullersaasulli allannguuteqarfigineqarnissaat aamma erseqqissaatigigaa Nuup kommuniata nittartagaani tamanna atuarneqarsinnaavoq.