Kangia-Kitaata kommunissaani siuttussat piareerput

Kangia Kitaata Kommunissaani IA, Demokraatit aammalu Ivittuunit Per Nukaaraq Hansenip isumaqatigiissutissaat aqagu saqqummiunneqassaaq.

Demokraatini eqqissiviilliornerup kingunerisaanik illuatungiliuttunngortussat Siumut Atassullu partiinik allanik suleqatiserinninnertut nipilimmik avammut saqqummiussaqaqqammerput.

- Isumaqatiginninniarnerit issarli 14. april naammassipput aammalu taamani nalunaarutigivarput aqagu ualikkut pingasunut isumaqatigiissuterput atsioriarlugu avammut nalunaarutigissallugu. Soorunami taanna attarparput, Asii Chemnitz Narup oqarpoq.

IA, Demokraatit aamma Ivittuuneersoq Per Nukaaraq Hansen atsioqatigiinnissaq sioqqullugu ippassaq inaarutaasumik oqaloqatigiipput,

- Paaseqatigiiffiuvoq aamma taanna ataatsimeeqatigiinnerput, taamaammat nalunaarutigeriigarput 15. apriilimili attapparput, erseqqissaavoq.

Demokraatit partiianni eqqissiviilliorneq ajuusaarutigaa.

- Oqassuunga soorunami ajuusaarnarpoq, Demokraatit iluminni aaqqiagiinngimmata, kisianni erseqqissumik nalunaarfigivagut namminneq ajornartorsiutigimmassuk aaqqinniartussaassagaat, uagullu akuliunniarnata aamma akuliuttussaatitaanata, Kangi kitaata borgmesterissaa oqarpoq

Illuatungiliuttut Siumut Atassullu, Demokraatit ajornartorsiuginnassappata IA-p suleqatigilersinnaanerpai?

- Naamik, soorlu oqareernittuut ataasinngornermi apriilip 14-ianili ualilluinnartoq atsioqatigiissutissarput piareerami aamma tamatuma kingorna allanngortoqanngilaq, nassuiaavoq.

Ernumanngilasi?

- Ilaana, Asii Chemnitz Narup taama oqarpoq.

IA, Demokraatit Ivittuunneersorlu Kangia Kitaata kommunissaani inissat 21-iusut ilaat 13-it issiavigissavaat, illuatungiliuttut Siumut Atassullu arfineq-pingasunik issiatitaqalissasut. Siuttunngortussat isumaqatigiissutaat Nuup Rådhusiani aqagu marlunngornermi apriilip ulluisa 29-anni ualikkut pingasunut saqqummiunneqassaaq.