Kangia kitaata kommuniani illuatungiliuttut piareerput

Siumut aatsaavissuaq illuatungiliuttunngortussaavoq. Siumut Atassutillu suleqatigiissutigiligartik ullumi saqqummiuppaat, taannalu pillugu Siumumeersoq Doris Jakobsen ima oqarpoq.

- Illuatungiliuttuuneq Siumumut nutaajuvoq aamma uatsinnut tamanut, taamaammat pissangartorujussuuvoq qilanaarnartorujussuullunilu.

Ilinniarfigissaqaarput. Aamma nalunngilarput suna suliassarissanerlutigu. Illuatungiliuttuunissamut piareersimavugut, Doris Jakobsen oqarpoq.

Demokraatit Inuit Ataqatigiillu Per Nukaaraq Hansen, Ivittuuneersoq peqatigalugu Kangia Kitaata kommuneani suleqatigiilersut, qinersinerup kinguninngua paasivarput.

- Siumut Atassullu avataaniitillugit isumaqatigiinniuteqalereerput, tamannalu tunngavigalugu uagut Atassullu suleqatigiissalluta isumaqatigiippugut, nangippoq, demokraatiskiusumik, inuit tamat oqartussaaqataanerannik ingerlatsissagaanni suleqateqarnissaq tulluartuunerarlugu.

Qinersiserpassuatik eqqaallugit, ikinnerussuteqaraluartik sunniiniutigisinnaasat namminnerlu anguniagassatut pingaartitatik Doris Jakobsenip anguniartariaqarsorai.

Siumut Atassullu suleqatigiissutissaminni isumaqatigiipput ataatsimiititaliani tamani inissanik marlunnik qulakkeerinninniassallutik. Isumaqatigiissut kommunalbestyrelsemi qinigaaffik tamaat atuutissaaq, quppernerpaalunnilu sulinerminni ataatsimiititaliani aalajangersaanernilu taaseqatigiittarnissartik nassuiarpaat. Ineriartortitassat ilaattut taakkartorpaat sulisoqarnermut politikki, kommunerujussuassami sulisut tamarmik naapeqatigiittarnissaanik imaqartoq.

Illoqarfiit najukkallu avinngarusimanerusut qanoq ineriartortinnissaat aamma suleqataaffigissavaat. Paaqqinnittarfeqarnerup tungaatigut akinik nalimmassaasoqassaaq. Ulloq unnuarlu paaqqutarinniffinni qasuersaartitassat tikeraallu inissaannik pilersitsinissaq aamma anguniarneqassaaq. Ilaqutariit timersoqatigiiffinni ilaasortaanerminnut aningaasatigut taperneqartalernissaat kiisalu kulturimut tunngatillugu, nutaamik kalaallisuuliornermik sanalunnermillu ilinniarfimmik peqalernissaq sulissutissat ilaattut taakkartorneqarput. IA Demokraatillu Kangia Kitaata kommuneani siuttunngussapput, illuatungiliuttunngortut suleqatigiilersut sinnerlugit Atassummeersoq Emilie Olsen ima oqarpoq.

- Soorunami Atassut suleqatigiinnissani ammasorujussuunikuuvugut, kisianni IA, Demokraatit Per Nukaaraq Hansenilu mattussuulluta, malinnaatinnata anguniakkanillu oqaluttuunnata pissusilersorput, oqarpoq.

Atassut isumaqarpoq sinnikorsiortitaassagunik ajorluinnassasoq.

- Suliamik naammassinnereerlutik atsiugassanik Atassutikkut tunissavaat. Isumaqarpunga isumaqatigiinniarnerit taama ingerlanngisaannartut. Inuit Ataqatigiit oqaraluarput teknikkiinnaasoq naammassippallu suliassartaanut uagut peqataalissasugut.

Taamaammat Atassutikkut isumaqatigiinniarnerit aallaqqaataaniilli peqataannginnertik naammaginngilaat.

”Silittumik suleqatigiinnissaq” isumaqatigiinniartut anguniagaralugu oqaatigisaraluartillugu imminnut mattullutik Kangia Kitaani kommunemi siuttuunissamik isumaqatigiinnerat Atassutikkut aamma uparuarumavaat.

- Atassummit uagut taanna nakkaannarfigissanngilarput, illuatungiliinissaq nukittuumik ingerlatissavarput, Siumut Atassutillu Kangia Kitaata Kommuniani suleqatigiinnissaat pillugu Emilie Olsen, Atassummeersoq oqarpoq.

Siumut Atassutillu Kangia Kitaata Kommuniani suleqatigiinnissaat pillugu kingulliulluni oqaaseqarpoq Emilie Olsen, Atassut.