Kangia Kitaata Kommuneani illuatungiliuttut suleqatigiilerput

Siumut Atassullu Kangia Kitaata Kommuniani suleqatigiinnissaminnik isumaqatigiissuteqarput pingaarnertut sulissutigissallugu Kangia Kitaata Kommuniani innuttaasut sutigut tamatigut pitsaanerpaamik sullinneqarnissaat.

Taamaaliornikkut amerlanerussuteqarlutik aqutsilernissamik isumaqatigiinniartut Inuit Ataqatigiit Demokraatit, Per Nukaaraq Hansen-ilu Siumup Atassutillu Kangia Kitaata kommunissaani inissanit 21-init arfineq-pingasunik isertitaqartut tunuliaquttatik peqatigilluinnarlugit illuatungilerpaat.

Tamat oqartussaaqataanerannut naapertuutinngilluinnartumik Inuit Ataqatigiit, Demokraatit, Per Nukaaraq Hansen-illu pissusilersornerat akuersaarneqarsinnaanngitsoq innuttaasunillu tamatigoortumik sullissinissamut annertusaataanngilluinnartoq Siumup Atassutillu suleqatigiinnissamik isumaqatigiissuteqarnermikkut naqissuserpaat, taama allagaqarput Siumumiit Doris Jakobsen Ane Egede Mathæussenilu Atassummillu Jensine Berthelsen aamma Gert Ignatiussen.

Siumup Atassutillu suleqatigiinnissamut toqqammaviat pillugu tusagassiortunik katersortitsisoqassaaq aqagu sapaammi marlunut Siumup ataatsimiittarfiani.