Kangersuatsiarmiut ikiorneqarusupput

Kangersuatsiaami toqutsisoqareernerata kingorna nunaqarfimmiut pisoq ilungersunartutut isigigaat Kangersuatsiami nunaqarfimmi aqutsisut siulittaasorigallagaata Edvard Emanuelsen Kristiansenip radioaviisimut oqaatigaa.

Edvard Emanuelsen Kristiansenip oqaatigaa Upernavimmi isumaginninnermut pisortaq suleqataalu Kangersuatsiamukarsimasut, suliassarlu pissusissamisut manna tikillugu suliarineqartoq, aqagulu sukumiinerusumik suliarineqalissasoq.

Upernaviup borgmesteria Jens Emanuelsen radioaviisimut oqarpoq pisut ilungersunartut pissutigalugit Namminersornerullutik Oqartussat aqagu saaffigineqassasut, tassalu tarnip pissusianik immikkut ilisimasalimmik Kangersuatsiamukartoqartariaqarnera.

Kangersuatsiaq ullumikkut 240-nik inoqarpoq.

Namminersornerullutik Oqartussanit oqaatigineqarpoq saaffiginnittoqareerpat aatsaat oqaaseqarfigisinnaallugu.

Kangersuatsiami toqutsineq tallimanngornerup arfininngornerullu unnuaani pivoq, toqutsisimasorlu tigusarineqareerpoq, killisiorneqareerlunilu sapaatip akunnerini sisamani tigummineqarallassaaq.

Kangersuatsiaami arnaq 26-nik ukiulik niviarsiararlu arfinilinnik ukiulik toqutaapput, qanorlu toqunneqarsimanersut politiinit suli oqaatigineqanngilaq, misissuineq suli ingerlanneqarmat.

Danmarkimiit toqusimasunik misissuisartut, taavunnassasut politimesteqarfimmiit ilisimatitsisutigineqarpoq.