Kangersuatsiami kissartunik nassaaqqipput
Suli paasineqanngilaq qanoq isillutik nunamiit kissartut aalamik pilersitsisut Kangersuatsiami qanoq isillutik pilersimanersut. Taakkuli kissartut eqqaanni ivikkat qorsorpallersimapput naak Upernaviup eqqaani ulluni makkunani 20-it ataallugit issikkaluartoq.
Nunamiit kissartut pillugit oqaluttuaq KNR-imi ataasinngornermi oqaluttuarineqarpoq. Kissartumik nunami pinngorarfiit pingasut nunaqarfiup iluani nassaarineqarput. KNR-ip tusarfiisa oqaluttuaraat kissartumik pinngoriarfinniit aalamik pilersoqarsimasoq aammalu kissartut taakku qanilligaanni kiassaatip kissartup assinganik kissassuseqartut.
Nunaqarfimmiut utoqqartaasa ilaat Vilhelm Christiansen maanna 71-inik ukiulik inuunermini taamaattunik nunaqarfimminni takusimannginnerarpoq.
Maannalu nunaqarfimmi tassani kissartumik pinngorarfiit pingasut allat nassaarineqarput, taamaasillutik kissartumik pinngorarfiit arfinilinngorlutik.
- Kissartumik pinngorarfiit pingasut ullumikkut nassaavut immap qaavaniit 94,5 meteri missaliorlugu qatsissuseqarput. Kissartumik pinngorarfiit allat assigalugit aalamik pinngorartitsipput, ilinniartitsisoq Suulut Kristiansen aamma assiliisoq KNR-imut ippassaq taama oqaluttuarpoq.
Ujarassiuut Danmarkimi nunatsinnilu misissuiviata GEUS-ip maanna pisimasoq misissorpaa.
Kangersuatsiarmiut KNR-imut oqaluttuarput nunap sajuttarnera qangali malussarfigisarsimallugu, ilaatigut nunap sajunnerani assit iikkami nivingasut malunnartumik aalasarsimanerarpaat.
