Kangersuatsiami inuit sullinneqassapput

Allattoq Mads Lynge
maajip 18-at 2005 15:49

Kangersuatsiami sapaatip akunnerata naanerani inunnik marlunnik toqutsisoqarsimanerata kingunerisaanik, inunnik isumaginninnermik suliallit peqqinnissaqarfimmilu sulisut Upernavimmeersut Kangersuatsialiartinneqarput.

Pisimasoq qanimut isiginiarlugu inunnik isumaginninnermik suliallit, peqqinnissaqarfimmilu suliallit Kangersuatsialiartinneqarput.

Kangersuatsiami innuttaasut tupatsitaasimaqisut aliasoqisullu tikissimagitsik Upernavimmi socialchefi Darius Sobczynski oqarpoq:

- Naak silagikkaluaqisoq innuttaasut angerlarsimarrattut maluginiarparput, alianartumillu pisoqarsimanera aamma malunnarpoq, Darius Sobczynski oqarpoq.

Taanna politiit peqqinnissaqarfimmilu sulisut ilagalugit helikopterimut ilaallutik Kangersuatsialiarsimapput, nunaqarfimmiut tikillugit namminneerlutik naliliiartorlutik.

Kangersuatsiami inunnik isumaginnittoq aamma ikiorniarlugu Kangersuatsialiartoqarpoq.

Arfininngormat ullaap tungaa tikinneqaqqaarput, taamanikkut Darius Sobczynski socialvagtilu nunaqarfimmut apuummata.

Ippassaq inuit arfineq-marluk nunaqarfiliartinneqarput, tassaappullu politiit, kommunefogedimik ikiuiartortut, kiisalu sulisut peqqinnissaqarfimmeersut inunnillu isumaginnittussat.

Eqqaaniaasoqarpoq, inunnillu oqaloqatiginnittoqarluni.

Atuartut oqaloqatigineqarput, pisimasorlu pillugu eqqarsaatersuutaat anninneqarlutik. Inunnillu isumaginninnermik sulialik eqqorneqanngitsuunngilaq:

- Oqaloqateqarnermi meeqqat eqqarsaatersuutaat sakkortusimaqaat, suleqaterpullu eqqortinngitsuunngilaq, Darius Sobczynski oqarpoq. Suliap maannamut ingerlarnga ajorineqanngilaq, siunissarli isigalugu isumaginninnermik suliallit tamanna pillugu artukkersorneqarsinnaassasut, Darius Sobczynski oqarpoq.

Kangersuatsiap innuttaasuinut sullissisoq tapersersorlugu Ilaqutariinnermut Pisortaqarfimmit ippassaq nalunaarutigineqarpoq, maannamulli oqarasuaatikkut ikiorsiisinnaanerarput.