Kangerlussuup ukiunik 75-inngortorsiorneranut atatillugu pinnguartarfik tunissutigineqartoq

Naalakkersuisut Kangerlussuup ukiuni 75-ini nalliuttorsiorneranut atatillugu innuttaasunut tunissuteqarput, ukioq mannalu meeqqat ukiorimmassuk immikkuullarissumik tunissuteqartoqarpoq. Naalakkersuisut tusagassiuutinut nalunaarummi taama ilaatigut allaaserisaqarput.
Assi © : John McIntyre/Flickr Creative Commons
Allattoq Mads Lynge
decembarip 09-at 2016 06:39

- Naalakkersuisut pingaartitarivaat meeqqat ukiuannut atatillugu, meeqqat ullumikkorniit annertunerusumik ilaquttatik peqatigalugit sammineqartarnissaasa periarfissaqalernissaat.

- Mannalu piffissaq eqqorlugu Kangerlussuup 75-inngortorsiorlugu nalliuttorsiutigineqarneranut atatillugu, Kangerlussuarmi pinnguartarfissamik pilersitsinissamik Naalakkersuisut aalajangersimapput, Naalakkersuisoq Martha Lund Olsen, Kangerlussuarmi nunaqarfimmi aqutsisut siulittaasuannut tunissummik tunniussinermut atatillugu taama ilaatigut oqarpoq.

Pinnguartarfissaq meeqqat kisimik pinnguartarfissaattut pilersinneqassanngitsoq nalunaarutigineqarpoq, ilaqutariilli tamarmik ataatsimoorlutik atorsinnaasaannik pinnguartarfik ilusilersorneqassasoq oqaatigineqarpoq.