Kangerlussuup marraanik qarmasissialiat illuliarineqartut

Kalaallit qarmasissiai siulliit marrarmik sanaat pitsaasorujussuupput.

Qarmasissiat Kangerlussuarmeersut Sisimiuni illuliorluni maanna atorneqarput.

Sisimiuni sisorartartut peqatigiiffiat marrarmik qarmasissianngortinneqarsimasunik maanna illuliortitsivoq. Qarmasissiat sivisulaartumik suliarisariaagaluartut illuliornermi atorneqarneri nuanaarutigineqarpoq. Danskit qarmasissiaat kalaallillu qarmasissiaat angeqqatigiinngimmata qarmaasut narlorissaasarnerat sivisunerusarpoq.

- Danskit qarmasissiaannit issunerupput centimeterinillu pingajuata affaata missaanik takinerullutik. Taamaattumik sivisunerulaartumik suliarisarpakka, pitsaassusaalli ajoquteqanngilluinnarpoq, sisorartartut peqatigiiffianni siulittaasoq qarmaasorlu Poul Erik Christensen oqarpoq nangillunilu:

- Qarmasissiat manngingaarmata imermut serpartaammik aggortariaqartarpakka. Qarmaasut kaataanik atuillunga nalinginnaasumik aggorsinnaaneq ajorpakka, Poul Erik Christensen oqarpoq.

- Qarmasissiat imermik milluaavallaarneq ajornertik pitsaaqutigaat. Assersuutigalugu qarmarneqaraangamik aqaguinnartoq panertarput panivillutik, Poul Erik Christensenoqarpoq, nangillunilu:

- Qarmasissiat pitsaasorujussupput. Danmarkimili ingasaatilaarlugit kissanneqartarsimapput. Immaqa kissanneqartarnerat iluarsiivigineqariarpat pitsaalluinnartunik kusanartunillu tunisassiortoqarsinnaassasoq, Poul Erik Christensen oqarpoq.

Qammasassianik, Siku Block-inik taallugit, nunatsinni siornatigut sanasoqartarpoq. Sisimiunili massakkut qarmasissiat atorneqartut qarmasissiaapput nalinginnaasut.