Kangerlussuup avannaani unioqqutitsillutik aavartut
![](/sites/default/files/styles/image_934x467/public/article_images/koerespor_i_aabent_land_1.jpg?itok=C1Wyx8m2)
Tuttut ikilisimanerannut pissutaavoq qamutit motoorillit sisamanik assakaasullit nunakkoorutit unioqqutitsilluni aavarnermi atorneqartalersimanerat.
Pisortat, piniarnermut nakkutilliisut, aavartartullu ilisimavaat qamutit motoorillit sisamanik assakaasullit unioqqutitsilluni atorneqartarnerat.
- Ukiut kingulliit sisamat kangerlussuup avannaani qamutit motorillit sisamanik assakaasullit 4 hjul-it aqqutigisimasaat, tassalu Kangerlussuup avannaa tamaaviat aqqutigisalersimavaat, Jakob Mølgård Kangerlussuup avannaani ukiuni arlaqartuni aavartartoq oqarpoq.
Piniarnermut nakkutiliisut aavarnerup nalaani kangerlussuarmiittuaannarsinnnaanngillat nuna annertoorujussuaq nakkutigisussaagamikku.
Piniarnermut nakkutiliisut Kangerlussuarmiinneranni qamutinik motoorilinnik atuisoqarneq ajortoq piniarnermut nakkutilliisoq Hans Mølgård oqaluttuuneqartarpoq.
- Piniarnermut nakkutiliisut Kangerlussuarmiinerisa nalaani oqaluttuunneqartarput ajortoqarnavianngitsoq, tassalu qamutinik motorilinnik Kangerlussuup avannaani ingerlaartoqarnavianngitsoq, Hans Mølgård oqarpoq, nakkutilliisut aallartullu suna tamaat qamutinik motorilinnik angallavigeqqilertaraat , Hans Mølgård oqaluttuunneqartarluni unnersiorpoq.
Qamutit motoorillit sisamanik assakaasullit pinngortitami aqqutigisimasaat Kangerlussuarmit avannamut 28 kilometerisut isorartutigsumi takuneqarsinnaasut Hans Mølgård oqarpoq.
Qamutit motoorillit aqqutigisimasaat ukiut kingulliit sisamat takussaaleraluttuinnartut Kangerlussuup avannaani ukiuni kingullerni aavartartoq Jakob Mølgård oqarpoq.
- Ukiut tamaasa malugisarparput tuttut ungavaraluttuinnartut, siorna aavartarfipput tuttukillisimasoq malugaarput, Jakob Mølgård oqarpoq, - Aajuitsup tasiata eqqaani aamma Sanningasullip tasiata eqqaani kangianilu , tassalu sivikitsumik pisulluni anguneqarsinnaasut siornatigut tuttunik pisaqarfiusaraluartut maannakkut tuttueruppoq. Jakob Mølgård oqaluttuarpoq.
Qamutit motoorillit atorneqartarnerisa kingunerisaanik uumasut Kangerlussuup avannaani takussaajunnaarput. Takornarianik angallasisartoq Jens Pavia Brandt Kangerlussuup avannaanut takornarianik angallassisarsimagaluarpoq, maannali uumasut soorlu umimmaat takussaajunaarmata pinngortitarlu innarlerneqarsimammat mingutsinneqarlunilu Kangerlussuup avannaannut angalallisissarunnaarpoq.
Qamutinik motoorilinnik unioqqutitsilluni atuisarnerit unitsinneqassappata, taakkuninnga atuisunik takunnittut assiliisarnissaannik piniarnermut nakkutiliisup Hans Mølgård-ip kaammattuutigaa taakkualu piniarnermut nakkutilliisumut politiinulluunnit nalunaarutigineqartassasut. Kangerlussuup avannaani unioqqutitsilluni motoorilinnik atuillui aavartarnerit unitsinneqassappata inatsisit sukannernerusut atorlugit unitsinneqarsinnaasut piniarmut nakkutiliisoq Hans Mølgård isumaqarpoq.
- Inatsisit sakkortunerusut atorneqalinngippata sukumiisumillu Kangerlussuup avannaa malinaaffigineqalinngippat, unioqutitsilluni qamutinik motoorilinnik atuineq unitsinneqarsinnaanngilaq, Piniarnermut nakkutilliisoq Hans Mølgaard taama oqarpoq.
Kangerlussuup avanaani ukiuni arlalinni aavartartoq Jakob Mølgaard ullut 14it matuma siornatigut qamutinik motoorilinnik atuisunik takuvoq.