Kangerlussuup Atuarfiani ajornartorsiutit annertuut aaqqinniarneqarput

Kangerlussuup atuarfiani piffissami kingullermi ajornartorsiutit annertuut ilinniartitsisut arlaqartut aallarumallutik kissaateqarnerannik kinguneqarsimasut Sisimiut Kommuniani atuartitaanermut pisortaqarfimmiit maanna aaqqiiviginiarneqarput.

Atuarfik marlunngornermiit sisamanngorneq ilanngullugu matugallarlugu Sisimiuni atuartitaanermut pisortaagallartoq Lars Jørgen Kleist, Sisimiuni atuarfimmi inuup pissusiinik ilisimasalik, atuarfiup pisortaa, ilinniartitsisut kiisalu atuarfimmi sinniisut peqatigiillutik ataatsimiissutigaat, ajornartorsiutit meeqqanik inuttut ajornartorsiuteqartunit aallaveqartut qanoq qaangerniarneqarsinnaanersut.

- Qularinngilluinnarpara ajornartorsiutit aaqqivigineqarsinnaasut. Ulluni marlunni ataatsimeeqattarnitsinni malugisinnaavara ilinniartitsisut qiimmaallattut. Malugisinnaavaat kommunip ajornartorsiutitik pimoorullugit aaqqiviginiaraat, Lars Jørgen Kleist oqarpoq.

Kangerlussuarmi atuarfik 76 inik atuartoqarpoq,

taakkulu amerlanersaat inuttut ajornartorsiuteqarnertik peqqutigalugu atuartitsineq ajornakusortittarpaat.

Lars Jørgen Kleist oqarpoq ajornartorsiutit qaangerniarlugit suliniutissat nutaat saqqummiussorneqartut, ilaatigut suliniutigineqassallutik angajoqqaanut attaveqarnerup pitsanngorsarneqarnissaa, ilinniartitsisut suleqatigiinnerat aamma sunngiffimmi sammisassaqartitsineq aaqqiviginiarneqarlutik.

Atuarfik arfineq marlunnik ilinniartitsioqarpoq pingasunillu timelæreqarluni. Sermitsiap nittartagaa naapertorlugu taakunannga marluk soraarniuteqarsimapput, ullunili kingullerni ataatsimeeqattaarnerit taakku isumaannik allanngortitsoqarsimanersut pasisinnaasimanngilarput.