Kangerlussuatsiami qaqqap sisoornera: Pissanganarlunilu annilaarnarpoq
Naja Lyberth Kreutzmann aappanilu nunaqarfiup Kangaamiut kangiani Kangerlussuatsiami tuperfissaminnik ujaasillutik umiatsiarput. Taakku Maniitsumit najugaqarfigisaminnit aallarsimapput.
Kangerluup iluani tuperfissaqqissumik nassaaramik tupertik napparpaat, Naja Kreutzmannillu aappaa sumiiffigisaminni assiliiartorpoq.
Naja Lyberth Kreutzmann tuperfiiginnarluni aaqqissuivoq.
- Tupermi iluarsaaserujoorlunga niperujussuaq takkuteriataara, taava takulerlugu ujaqqat siullermik annikitsunnguit nakkakaasut taava tassanngaannarujussuaq ujararujussuaq qaqqat nakkakaaleriataarput, Naja Lyberth Kreutzmann oqarpoq.
Video: Naja Lyberth Kreutzmann.
Qujanartumilli qaqqaq 2 kilometerit missaannik ungasitsigaa. Taamaakkaluartorli Najap qanoq iliornissani nalileruminaatsissimagamiuk ersiummersimavoq. Qimaassava imaluunniit sumiiffigisamini uninngaannassava?
- Unissasoralugu naalaarlugu filmiliarivara. Siullermik filmiliarigakku qamikkaluarakku, eqqarsarlunga qimaaniarpunga toqorusunngilanga. Taava eqqarsarlunga immaqa ingasappallaarnavianngilaq, taava filmiareqqillugu pujorsuaq alliartuinnalermat filmiliara qameriarlugu qummut qimaavunga, Naja Lyberth Kreutzmann oqarpoq.
Assi: Qaqqap Kangerlussuatsiami sisoornera nalunaaqutsersimavoq. Google Maps.
Unnuiinnartut
Qaqqallu sisoorneranit pujorsuaq qanilliartuinnalermat aatsaat Naja ungasinnerusumut qimaasimavoq.
Umiatsiaaraat imaaniittoq qaqqap sisoorneranit mallinit eqqugaaneruvoq pujoralammillu ulinneqarluni.
Qujanartumilli ajoqusersimanngilaq.
- Taamaallaat pujoq makkua pujorallersuaarluni, qaqqarsuit nakkakaaneranni saningaatsiarparput aqaguani.
Naak nalaataaq annilaarnaraluartoq Naja aappanilu sumiiffigisaminni unnuiinnarniarlutik aalajangersimapput.
- Kisianni unnuakkut nakkakaallattaarpaluppoq, kisianni taamarujussuunngitsoq. Taama ualikkut aatsaat ingerlavugut, suli tassani nakkaallattaarpoq, kisianni taamarujorujussuunani. Naja oqarpoq.
Upalungaarsimasut pisortaat: Qanillattussanngilarsi
Qeqqata Kommuniata upalungaarsimanermut pisortaata, Ole Kreutzmannip videoliaq facebookikkut pingasunngornermi takugamiuk aatsaat qaqqap sisoorsimanera paasivaa.
- Allamik oqaasissaqanngilanga: Inuit mianersoqqussavakka, taamaattunut qanillinnginnissaat kissaatigalugu aamma nalugatsigu suli ulorianarnersoq, suli sisooqqissinnaanersoq. Aamma taamatut qaqqat sisoortillugu malissuit annertuut pilersinneqarsinnaammata, Ole Kreutzmann oqarpoq.
Taassuma pisoq maanna misissuiffiginialerpaa, qaqqamilu tassani suli sisoortoqaqqissinnaaneranut aarlerinartoqarnersoq paasiniarniarlugu.
- Ukua qaninnerpaat tassa Kangaamiuniittut taakku attavigisussaassavagut arlaannik ilisimasaqannginnersut. Taavalu Namminersorlutik Oqartussat arlaannik ilisimasaqarnersut apeqquteqarfiginiarpakka, upalungaarsimasut pisortaat oqarpoq.