Kangerlussuarmukarnissaq arfininngorpamut kinguarpoq

Timmisartorsuaq Kunuunnguaq aqagu piariissagunarpoq
decembarip 20-at 2007 17:04

Air Greenlandip Narsarsuup Københavnillu akornanni timmisartuussinissaa kinguaattooqqittoq, Air Greenlandimit tusagassiuutinut nalunaarutigineqarpoq.

Kunuunnguaq atorlugu Narsarsarsuarmut ippassaq timmisartuussinissaagaluaq ullumikkumut kinguartinneqaraluartoq, suli nalunaaquttap akunnerinik 24-nik kinguartinneqaqqippoq. Ilimagineqarpoq Kunuunnguaq aqagu piariissasoq, Københavnimiillu ulluni kingullerni marlunni Narsarsuarmukarniarsaralutik taavalu Narsarsuarmiit Københavniliarsaralutik utaqqisariaqarsimasut taamaalillutik assartuunneqarsinnaalissapput.

Air Greenland juullip qalliartornerani ulapaartaqaaq, taamaammat timmisartumik aqagu Kangerlussuarmukarsinnaasumik nassaarsinnaasimanngillat, aqagulu Kangerlussuarmukarnissaraluaq arfininngorpamut decembarip ulluisa 22-annut kinguartinneqartariaqarsimavoq, taamaalilluni Kunuunnguaq atorlugu Kangerlussuarmukartoqassaaq. Danmarkimiit Kalaallit Nunaannut ilaasussat hornorujut missaat, Kalaallit Nunaanniillu Danmarkiliartussat 60-it missaat taamaalillutik eqqugaassapput.

Københavnimiit arfininngorpat decembarip ulluisa 22-anni Danmarkimi nalunaaqutaq malillugu ullaakkut nalunaaqutaq 07.15 aallartoqassaaq, Kangerlussuarmut uagut nalunaaqutarput malillugu 07.55 tikittussamik. Kangerlussuarmiit arfininngorpat nalunaaqutaq 09.10 aallassaaq Københavnimullu tikissaaq Danmarkip nalunaaqutaa malillugu 17.30.