Kangerlussuarmi innuttaasut naalakkersuisunit ippassaq neriorsorneqarput Kangerlussuaq matuneqarnavianngitsoq, inuussutissarsiornerlu ineriartortinniarlugu pitsanngorsaatissat assigiinngitsut suliniutigineqalissapput.
Pitsanngorsaatissanut ilaavoq Sisimiuniit Kangerlussuup tungaanut aqqusinniortoqarnissaanik ammaassisoqarnera, inuussutissarsiutitigullu periarfissat suunersut misissorniarlugit suleqatigiinnik pilersitsisoqarniarpoq. Apriilip tallimaanni kommunalbestyrelsinut qinersisoqareerpat suleqatigiissitaliaq pilersinneqassaaq. Hermann Berthelsenip erseqqissarpaa pitsaanerpaasimassagaluartoq Kangerlussuaq nunatta mittarfissuatut ingerlaannarpat:
- Pitsaanerpaassagaluarpoq Kangerlussuaq nunatta mittarfissuarippagu, kisiannili naalakkersuisut inatsisartullu aalajangissappata Nuuk 1,8 kilometeritut takitigisumik mittarfeqalissasoq, taava Kangerlussuup ataannarnissaannut periarfissanik ujarlertariaqarpugut taamaalioreerpugullumi. Ukiut pingasut ingerlaneranni taamaaliulinngikkutta kingusinaaqinaagut, Hermann Berthelsen oqarpoq.
Kangerlussuarmi nunaqarfimmik aqutsisut siulittaasuat, Fritz Baumann Petersen oqarpoq tamanna tusaatissatut tigugitsik, nunalu tamakkerlugu politikki sunniuteqarfigisinnaanngikkaluarlugu, piumasaqaatitik tusartissimagitik.
