Kangerlussuarmiut peqataalluartut

Kangerlussuup siunissaa pillugu ippassaq unnukkut ataatsimiisitsisoqarpoq. Peqataarusuttut imaaginnavissimapput, apeqquteqarusuttullu amerlasimaqalutik.

Innuttaasunut ataatsimiisitsineq Kangerlussuup hoteliani ingerlanneqarpoq, taamaammallu inissat killeqarsimallutik. Taamaakkaluartoq inuit 118-t ataatsimiigiarput, ataatsimiisitsisunullu

apeqquteqarusuttoqarsimaqaaq.

Peqataarusuttut amerlangaarmata takkuttut ilaat angerlaannartariaqarsimapput.

Angallannermut naalakkersuisoq, Jens Napaattooq, Sisimiut borgmesteria Hermann Berthelsen, Kangerlussuarmilu nunaqarfimmut aqutsisut siulittaasuat Fritsz Baumann Petersen ataatsimiisitsipput.

Ullut kingulliit Kangerlussuaq pillugu pilersaarutit innuttaasunit apeqquserneqaqattaarput. Ukioq 2011-imi Nuup Ilulissallu mittarfiisa annertusarneqarnerisigut Kangerlussuakkoorlutik nunatsinnukartartut 77 procentinik annikilleriarsinnaapput. Kangerlussuakkoorlugu nunatsinnukartut 60 procentii Nuummukartarmata, 17 procentillu Ilulissiartarlutik.

Angallannermut naalakkersuisup Jens Napaattuup neriorsuineratigulli Kangerlussuaq matuniarneqanngilaq. Tamanna pillugu tusagassiuutit tusarliisarsimanerat ajorinerarlugit oqaaseqarpoq.

Kangerlussuakkoorlutik nunatsinnukartut annikilleriassapput, kisiannili takornariaqartitsinerup ineriartornera ilutigalugu Kangerlussuarmut tunngatillugu isumannartoqanngitsoq naalakkersuisoq innuttaasunut ippassaq oqaaseqarpoq.

Radioaviisillu paasisai malillugit Kangerlussuarmi inuussutissalerineq pillugu misissuisussamik suleqatigiissitaliortoqalersaarpoq. Suleqatigiissitap misissussavaa 2011-p tungaanut suliffissanik pilersitsisinnaanermi periarfissat suunersut.

Ataatsimiisitsisut ataatsimiigiallu akunnerani oqallittoqarsimaqaaq, ataatsimiisitsisoqarnerullu inernera aamma oqallisigineqarsinnaalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat