Kangerlussuarmiit Baltimoremut timmisartuussisoqartalissaaq
Air Greenland-ip ukiumoortumik ippassaq ataatsimeersuarnerani siulersuisut nalunaarutigaat, 2007-mi USA-mut timmisartuussiffik nutaaq ammarneqassasoq.
Timmisartukkut aqqut nutaaq 2007-mi maajimi ammaanneqartussaq Kangerlussuarmiit Baltimore-mut timmisartuussiffiussaaq. Takorloorneqarpoq maajimiit septembarip tungaanut aallaqqaammut ingerlanneqassasoq.
Air Greenland piffissami sivisuumi kitaanut timmisartuussisalernissamik eqqarsaateqarsimavoq. Canadamuussanersoq USA-muussanersorluunniit nalilersorneqarsimavoq, iilimagineqarporlu USA-p kangisissortaaniittoq Baltimore toqqarneqarumaartoq.
-Aallartinnissatta tungaanut naammattunik ilaasussaqarneq ilimanaateqassappat ukioq kaajallallugu timmisartuussisinnaaneq eqqarsaatigineqarsinnaavoq, Air Greenlandimi pisortaaneq Flemming Knudsen oqarpoq.
Timmisartuussiffissap piareersarneqarnissaa, minnerunngitsumillu Amerikap avannaani takornariartitsisartunut nittarsaanissaq aallartinneqartussanngorput.
Timmisartuussiffissaq nutaaq nunatsinni innuttaasut takornariarfissaannut nutaanut, inuussutissarsiutitigullu periarfissanut nutaanut aamma ammaassissasoq Flemming Knudsen ilanngullugu oqarpoq.
