Kangerlussuarmi ulloq unnuarlu angerlarsimaffiliornialerput

Kalaallit meerartaasa inuusuttuarartaasalu inuuniarnermikkut ajornartorsiuteqartut, ulloq unnuarlu angerlarsimafissaat nutaaq pilersinneqarnialerpoq. Pilersitsisussat tassaallutik, Danmarkimi illoqarfiup Hadstenip eqqaani ulloq unnuarlu angerlasimaffinnik arfinilinnik ingerlatsisut, aningaasaateqarfik 'Kanonen'. Taakku Kangerlussuarmi angerlarsimaffimmik aallartitsissapput januaarip aallaqqaataani 2013-imi.

Ulloq unnuarlu angerlarsimaffimmik aallartitsinissaq pillugu, Namminersorlutik Oqartussat aningaasaateqarfiullu Kanonenip akornanni isumaqatigiissut sisamanngormat atsiorneqarpoq.

Pilersaarutaavoq danskit perorsaasut aqqaneq marluk kalaallinik perorsaasunik arfinilinnik suleqateqarlutik, ulloq unnuarlu angerlarsimaffissaq Kangerlussuarmiittussaq ingerlatissagaat.

Taamaattumik aallartitsinissaq Kommune Kujallermi inunnik isumaginninnermut pisortaamit, Mikkel Ballemit nuannarutigineqassaqaaq. Tassami taanna radioaviisimut ippassaq oqarpoq, ulloq unnuarlu angerlarsimaffinnik amingaateqarnerup pilersikkaa, meeqqat inuusuttuaqallu paarisariaqarluinnartut pingasut, allatut ajornartumik Danmarkimut aallartittariaqartut, oqartussat maanna qanoq iliuuseqanngippata tamanna avaqqunneqarsinnaanani.

- Meeqqat qulinik aqqanilinnillu ukiullit qallunaatulluunniit oqalussinnaanngitsut Danmarkimut aallartinneqarneri innarliinerussaaq annertooq, Kommune Kujallermi inunnik isumaginninnermut pisortap, Mikkel Balle-p taama oqarnera aningaasaateqarfiup Kanonen-ip pisortaanit, Trine Hounsgaard Pfeifferimit isumaqatigineqarpoq.