Kangerlussuarmi terianniat perlerortut
Terianniap aappaa Pilersuisup pisiniarfiata eqqaanut, inuit pisiniarfilialeruttorfiisa nalaanni, arfininngormat ullaap tungaani qanillattorsimasoq nalunaarutigineqarpoq, terianniallu aappaa nunaqarfiup qeqqani biilip assakaasuanik kimmaaleruttortoq biilimit aportissimasoq kingornalu toqunneqarsimasoq aamma nalunaarutigineqarluni.
- Inunnut qunutunngilluinnarnerata pissusissamisullu pissusilersunnginnerata, soorlu biilip assakaasuanik kimmaaniarnerata, takutippaa perlerortuusoq, uumasut nakorsaat Sanne Eline Wennerberg oqarpoq.
Kangerlussuarmi innuttaasut teriannianut taamaammat qaninngoortannginnissaat kajumissaarutigineqarpoq. Teriannianik nunaqarfimmut qaninngoortoqarpat politiit kommunilluunniit qimmilerisua ilisimatinneqartarnissaat kajumissaarutigneqarpoq.
Kangerlussuarmilu qimmiutillit qimmitik ungalukkamiitittassagaat aamma kajumissaarutigineqarpoq.
- Taamaakkaluartoq qimmillit kaammattorusuppakka qimmitik ungalukkamiitittassagaat, qimmillu ukiut pingasut sinnerlugit perlerornermut akiuussummik kapitinneqarsimasuunissaannik qulakkeerinnissasut, Sanne Eline Wennerberg oqarpoq.
Taassuma aamma ilisimatitsissutigaa terianniat niaqui nassiunneqassasut, tamatumuuna terianniat perlerornersut qularnaarneqassalluni.
