Kangerlussuarmi takisuumut arpattoqarpoq
Polar Marathon-imik taallugu Issittumi takisuumut arpalluni unammineq, nunanit assigiinngitsunit arfineq marlunnit peqataaffigineqartoq, Kangerlussuarmi arfininngormat ingerlanneqarpoq.
Kangerlussuarmi taama unammisitsinermi peqataasut sermersuaq ilaatigut aqqutigaat. Arpannermi aqqutigineqartoq ilungersunartunik ulikkaarmat unammeqataasut amerlanersaasa nalinginnaasumik angusarisartagaat akunnerup affaanik akunnermilluunniit sivisunerusimasoq, unamminermik malinnaatitaqartoq, aviisi BT, allaaserinnippoq.
Kangerlussuarmi Polar Marathon-imik taallugu takisuumut arpatsitsinermik aaqqissuisuupput qallunaat marluk, tassaasut angalatitseqatigiiffimmi Albatros Travel-imeersoq, Rune Kjær Nortoft, aapparalugu Danmarkimi atletikkertartut kattuffianni siulittaasuusimasoq, Thomas Thomsen.
Polar Marathon 2001-imi, 2002-mi aamma siorna ingerlanneqarput. Kalaallit, danskit, tyskit, ungarnimiut, østrigimiut, hollandimiut spaniamiullu Polar Marathonimi ukioq manna unammeqataasut, BT-mi aallaserineqarpoq.
