Kangerlussuarmi sukkaniunnissamut annertuumut piareersartoqartoq

Kangerlussuaq biilinik innaallagissamoortunik aggustip naanerani sukkaniunnissamut aaqqissuisuussaaq. Isiginnaartut millionilikkaassasut, Qeqqata Kommuniata oqaatigaa.

Biilinut innaallagiatortunut Extreme E-mik taaguuteqartumik sukkaniuunneq Kangerlussuarmi ukioq manna aggustip 28-anni 29-annilu ingerlanneqassaaq. Tamanna qaammatit pingasut qaangiuppata pissaaq.

Taamaammat Qeqqata kommunia ulluni makkunani aaqqissuussinissamik pilersaaleruttorpoq. Sukkaniuunneq Akuliarusiarsuup kuuani, Russels gletsjerip eqqaani ingerlanneqassaaq.

Tassa Kangerlussuarmi sermersuup eqqaani biilinik innaallagiatortunik sukkaniuuttoqassaaq, kommunillu tamanna takornarianut pilerinarsaataanissaa naatsorsuutigaa.

- Sukkaniuttoqarneratigut Kangerlussuarmut 500-nik amerlanerusunillu tikeraartoqassaaq. Nunarsuaq tamakkerlugu malinnaaffigineqarluartumut aaqqissuussisuussaagut, Qeqqata Kommuniani pisortaaneq, Juliane Henningsen oqarpoq.

Nunarsuarmit tamarmit isiginnaartoqassasoq

Tikittut saniatigut nunarsuarmit tamarmit millionillit malinnaanissaat kommunip naatsorsuutigaa. Kommunip oqarnera naapertorlugu nunarsuarmi tusagassiorfiit annerpaavinit tusagassiortut aaqqissuussinermut peqataajartorniarlutik nalunaarutigaat.

Biilinik Saudi Arabiami poorskikkunni sukkaniuuttoqarmat tamanna nunani 180-ini tv-kkut aallakaatitsivinni aallakaatinneqarpoq, sukkaniunneq pillugu nutaarsiassat 4.500-pput, inoqatinullu attaveqaatitigut malinnaasut 87 millioninit amerlanerullutik.

AAMMA ATUARUK Biilit innaallagissamik ingerlatillit 2021-mi sukkaniutsinneqassapput

Kommunimi pisortaanerup tamanna nunatta nittarsaanneqarneranut pitsaasuussasoraa.

- Tassa imaappoq nunap immikkoortua nunarpullu pitsaasumik nittarsaatissavarput. Sukkaniunnermik nunatsinnillu malinnaasorpassuit nunatsinnut pissanganartumut annerusumik takunnikkiartorlutik takornariarusulernissaat neriuutigaarput, Juliane Henningsen oqarpoq.

Corona ajornakusoortitsisinnaasoq

Nunarpassuilli allat aamma unammissutigisaanik viruseqarpoq. Tassunga atatillugu kommunip corona pillugu allattoqarfik suleqatigigaa, Juliane Henningsen oqarpoq.

- Aggustimi pissutsit qanoq innissaat ilisimanngilarput. Kisianni isumalluarpugut.

- Innuttaasut amerlanerit maanna akiuussutissamik kapitereerput. Taamaammat pilersaarummi maani peqataasussat sinneri aamma akiuussutisserneqarsimanissaat neriuutigaarput, taamaaliornikkut peqataasut sukkaniuulluartoqassalluni. Kisianni tamanna aamma avataanit 500-nit amerlanerusunik tikittoqartitsisinnaanissatsinnut qulakkeerutaassaaq.

Qeqqata Kommuniani borgmesteri Kangerlussuarmi sukkaniuttoqarnissaa pillugu pingasunngornermi innuttaasunut ataatsimiititsissaaq.

Sukkaniuttoqarnerani silap pissusiata allanngoriartornerata ukkatarineqartinnissaa siunertavoq. Sukkaniunneq inoqajuitsumi aamma ingerlanneqareerpoq. Tamannalu Saudi Arabiami Alulami apriilip ulluisa pingajuanni sisamaannilu ingerlanneqarluni.

Maajip qaammataata naanerani Senegalimi Lac Rosemi immap qaffakkiartornera takutinneqassaaq.

Issittumilu silap pissusiata allanngoriartornera assersuutigalugu Kangerlussuarmit takutinneqassalluni.

Biilinik innaallagiatortunik sukkaniunnermi aqqit ilisimaneqarluartut aamma peqataassapput.

Rallymik nunarsuarmi pissartanngorniunnermi qulingiluariarluni pissartanngornikoq Sebastian Loeb aamma formel 1-imik sukkaniuuttartoq Jenson Button Kangerlussuarmi aggustip naanerani ilaatigut pissartanngorniuteqataassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat