Kangerlussuarmi sapaatit-akunnerata naanerani arpaliuttoqarpoq

Kangerlussuarmi arpaliunneq moskusløbet ippassaq sapaammi sisamassaanik ingerlanneqarpoq. Ileqqorlu malillugu ilisimatusarnermut tapiissuteqartarfik KISS (Kangerlussuaq International Science Support), arpaliutsitsinermik aaqqissuisuuvoq.
Allattoq Simon Uldum -
aggustip 17-at 2015 05:24

Moskusokseløbet, aamma Run of the musk oximik taaneqartartoq, Kangerlussuarmiut meerartaannit inersimasortaannillu, amerikamiut sakkutuuinit, politiinit allarpassuarnillu peqataaffigineqarpoq.

5 kilometerinut aammalu halvmaratonimik arpaliuttoqarpoq, 5 kilometerinut arpaliunneq 145-nit peqataaffigineqarpoq halvmaratonilu 20-t missaannik peqataaffigineqarluni.

Arpaliunnerup kingorna amerikamiut namminneq kajumissutsiminnik suliaqartut burgerillerlutillu hotdogillerput.

Arpaliunneq Kangerlussuarmi suliffeqarfinnit arlalinnit tapersersugaavoq sinneqartoorutillu Kangerlussuup atuarfianut, Qinnguata Atuarfianut, tunniunneqarput.

Sinneqartoorutigineqartartut ukiuni kingullerni marlussunni atuarfiup 6. klassiisa Københavnimut paassisassarsiorlutik angalanerinut atorneqartartut, atuarfiup pisortaa Jens Borch Scharnberg KNR-imut oqaluttuarpoq.