Kangerlussuarmi qamuteralaat atorlugit inerteqqutaasumik piniarneq

Sisimiuni illoqarfimmi piniartut ilaata tuttunniarnerminut atatillugu qamuteralani Kangerlussuarmi assartuiffiusussatut aaqqissuussiffigineqartup avataatigut atorsimagai, Sisimiuni piniarnermut nakkutilliisup paasisimavaa.
Allattoq Elisa Isaksen
marsip 06-at 2013 07:08

Tuttunniarnerni marluusuni tuttut qulingiluat aamma 19-it pisarineqarsimasut assartorneqarlutillu, Johan Davidsenip Sisimiuni politiineersup oqaatigaa.

Nalunaaruteqartoqarnerata kinguneranik piniarnermut nakkutilliisup piniartoq malinnaavigisimavaa. Taamaattumik sapaatip akunnerani kingullermi taassuma piniartup ingerlavigisimasai illinersiorlugit tuttut sumi aallaaneqarsimanersut nanisinnaasimavaa.

Qamuteralannik piniarsimasut akiliisitaasussanngoraangata, pisarineqarsimasut nalingat aallaavigalugu akiligassiisoqartarpoq.

Unnerluutiginnittoqarsinnaanersoq politiit maanna misissuleruttorpaat, inatsisinilli unioqqutitsisoqarsimagaluarpalluunniit piniartoq akiliisitaanngitsoorsinnaavoq. Qamutinik motoorilinnik Sisimiut Kangerlussuullu eqqaani atuisinnaanermut malittarisassat kommunitoqqanut atuuttuupput, taamaattumillu kommunit kattussuunnerisa kingorna suli atuunnersut politimestereqarfiup apeqquserpaa.