Kangerlussuarmi niviarsiaraq ajunaarpoq
Kangerlussuarmi niviarsiaraq tallimanik ukiulik tallimanngormat unnukkut arferngup missaani biilinik aportilluni ajunaarpoq.
Bussit timersortarfiup ungasinngisaanut fritidsklubbip eqqaanut unimmata ilaasut nioorartillugit ajunaarneq pisimavoq. Niviarsiaraq bussit tunuatigoorluni arpassimavoq, arnallu biilertup apunngitsoorsinnaasimanagu. Niviarsiaraq ingerlaannaq toqusimavoq.
Kangerlussuarmi politeeqarfimmi pisortaq Kristian Graversen oqarpoq, meeqqat ukiukitsut arlallit ajunaarnermik takunnissimasut. Taamaattumik Sisimiut Kommuneata tarnip pissusaanik ilisimasallit pingasut ikiuiartortillugit ippassaq aallartippai. Ajunaartup ilaqutai kiisalu meeqqat takunnittut arnarlu aporsisoq tarnip pissusaanik ilisimasallit ikiorlugit aallartereerpaat.
Kristian Graversen aamma oqarpoq, ajunaarneq pillugu erseqqinnerusumik suli paasiniaasimanatik, kikkut tamarmik suli tupaqqammata. Sisimiuniilli pilertortumik ikiuiartortitsineq nuannaarutiginerarpaa, pisimasullu pillugit ulluni tulliuttuni paasiniaanerit ingerlanneqassanerarlugit.
