Kangerlussuarmi najugallit nikallornianngillat
Kangerlussuarmi najugallit nikallornianngillat. Angallannermut Naalakkersuisup isummaminik allanngortitsinera Kangerluassuarmi innuttaasunut ernumatitsisoq Kangerlussuarmi nunaqarfimmi aqutsisuni siulittaasoq Fritz Baumann oqarpoq.
- Ullaaq Kangerlussuarmi namminersortut ilaannit sianerfigineqarpunga, oqaruartuuteqartumik Kangerlussuarmi illuliorniarunnaarluni. Angallannermut naalakkersuisup ulluni kingullerni nalunaarutigisartagai taamak nalorninartoqartigitillugit taamatut ingerlasoqaannalernissaa ilimagaarput, Kangerlussuarmi nunaqarfimmi aqutsisuni siulittaasoq Fritz Baumann oqarpoq.
Kangerlussuarmi ineriartorneq taamatut ingerlaannalerunarpoq. Kangerlussuarmi takornariaqartitsinermik ingerlatsisut aamma ineriartortitsinissamut aningaasaliinissamut unitsitsigallarput.
Aamma KNI suliassanik arlalinnik aallartitsissamaartoq utaqqimaalerpoq. Allaat mittarfiup qatserisartui nalornilerlutik ualeq manna sulinertik unitsikkallarlugu ataatsimeeqatigiipput.
Kangerlussuup siunissaa qanoq issanersoq nalornissutigineqalerpoq.
Kangerlussuarmi nunaqarfimmi aqutsisuni siulittaasoq Fritz Baumann oqarpoq Kangerlussuarmi innuttaasut 520-iusut, taakkunanngalu ilaqutariit meerartallit aalajangersimasumik suliffeqartut siunissaat maannakkut nalorninarsiortinneqalersoq.
Kangerlussuarmi nunaqarfimmi aqutsisuni siulittaasoq Fritz Baumann oqarpoq Kangerlussuup matuneqarnissaata pinaviannginneranik oqaluttoqaraluartoq, ineriartorneq taamaaginnassappat aningaasaliissutit ikiliartorlutik naggataatigut Kangerlussuup matunissaa ilimanarsinnaasoq.
Fritz Baumann-illu eqqarsaatigaa suliaq Kangerlussuarmut tunngasoq torernerusumik ingerlanneqarsimasinnaanngikkaluarnersoq. Sisimiut kommunea aammalu Namminersornerullutik oqartussat Kangerlussuarmut atatillugu aningaasarpassuarnik atuereerput. Friz Baumann-illu assersuutitut taavaa atuarfik nutaarsuaq qanittumi sananeqartussaq. Aamma atuareernerup kingorna ornittagassamik sanasoqarnissaa aningaasaliiffigineqareerluni. Fritz Baumann-ilu nangilluni oqarpoq angallannermut naalakkersuisup avammut nalunaarutigisartagai paatsiveqanngitsut, siullermimmi oqarmat nuup mittarfia tallineqassanngitsoq, maannakkullu aalajngerluni nuup mittarfia tallineqassasoq. Kangerlussuarmi aningaasarpassuit atorneqareerput, maannakkullu oqaluttoqalerluni Kangerlussuaq matuneqarumaartoq, Kangerlussuarmi nunaqarfimmi aqutsisuni siulittaasoq Fritz Baumann naggasiivoq.
