Kangerlussuarmi mittarfimmi atorfillit soraarsinneqassanngitsut: Eqqissiallappugut

Air Greenlandip Kangerlussuarmi mittarfimmi sulisuinut nuannersoqarpoq.

Pele Knud Mathiessen taassumalu suleqatai nassatanik niooraasarlutillu timmisartumik mittarfimmillu piareersaasarput. Taassuma sinniisutut pingasunngormat ataatsimeeqataanerani mittarfimmi sulisut soraarsinneqarnavianngitsut nalunaarutigineqarpoq.

- Tamatta toqqissiallassaagut. Suleqatikka kalerrissavakka. Dash-8-nuku marluk massakkut maani usilersoraat, Pele Knud Mathiessen KNR-imit oqaloqateqarnermini oqarpoq.

Timmisartuutileqatigiiffiup atorfiit 75-init 100-inut atorunnaarsittariaqarai Air Greenlandimit nalunaarutigineqareersorlu taama qisuariaateqartoqarpoq. Timmisartuutileqatigiiffik coronap ajornartorsiortitsinerani nunat killiinik matoqqatitsinermi timmisartullu nunamiitsiinnarneqarneranni timmisartuutileqatigiiffiit allat assigalugit eqqugaaqqavoq.

AAMMA ATUARUK Air Greenland soraarsitsiortortoq: makkunani atorfiit atorunnaassapput

Pele Knud Mathiessenip oqarnera naapertorlugu Kangerlussuarmi mittarfimmi sulisut taama amerlassuseqartut Air Greenlandip pisariaqartippai. Taamaammat atorfinitsitsiunnaarnissaq taamaallaat pisariaqassaaq, taamaalillunilu soraarsitsinerit pinngitsoorneqarsinnaallutik.

Mittarfimmili atorfillit ataatsimiinnginnerminni coronap ajornartorsiortitsinera qanoq iliuuseqarfigineqarsinnaaneranut sulisullu qanoq amerlatigisut pisariaqartinneqarnerannut iliuusissamik pilersaarusiorsimapput.

- Soorunami taamatut naatsorsuutigimisaareersimavarput COVID-19-ip nunarsuarmi suna tamaat kalluaramiuk. Taamaammat arlaatigut sillimareernikuuvugut taamaattoqariataarnissaanut. Kisianni minnerpaaffissaaniitsinniarsarinikuuarput, Pele Knud Mathiessen oqarpoq.

Ataatsimut isigalugu maajip naanerani paasinarsissasoq

Air Greenlandip soraarsitsinerit qanoq pitsaanerpaamik naammassineqarsinnaanersut maanna misissuiffigileruttorpaa.

Timmisartuutileqatigiiffiup atorfiit allaffimmiittut timmisartuussinermilu sulisut akornanniittut naligiissaarlugit atorunnaarsissagai siusinnerusukkut nalunaarutiginikuuaa.

Air Greenlandip oqarnera naapertorlugu atorfiit atorunnaarsinneqartariaqartut ataatsimut isigalugit maajip naanerani paasineqarsinnaalissapput.

AAMMA ATUARUK Air Greenland atorfinnik 75-100-nik atorunnaarsitsisoq

Timmisartuussinermi timmisartuni, Airbusimi Dash-8-inilu sulisut pingaartumik ikilisaavigineqarnissaat pisortaanerup, Jacob Nitter Sørensenip nassuiaatigaa. Allaffissornermilu ’atorfinni tamani’ ikilisaasoqassalluni.

- Uggornarpoq. Air Greenland ilaqutariittut ippoq, amerlasuut maani sivisuumik sulisimapput, taamaammat pissutsit ajornakusoorput. Sulisut, aqutsisut sulisullu peqatigiiffii suleqatigalugit sapinngisamik qajassuussiniarsarivugut.

- Immikkoortortaqarfiit assigiinngitsut ataatsimeeqatigereerutsigit sulisunut tamanut ataatsimut nalunaaruteqassaagut, Jacob Nitter Sørensen KNR-imut oqarpoq.

Siunissamut neriuuteqartoq

Kangerlussuarmi Pele Knud Mathiessenip taassumalu suleqataasa siunissap qaammariartulernissaa neriuutigaat.

- Tassami soorunami neriuutigaarput tamatta toqqissisimasumik suliffeqarnissarput. Tamatta taamatut neriuuteqarpugut. Ilaqutaratta aamma amerlasuut maani Kangerlussuarmi. Ilaqutariillutalu maani Kangerlussuarmiilluta. Nalornisoqarani taamatut, Pele Knud Mathiessen oqarpoq.

KNR-ip timmisartumi saqisut timmisartortartullu peqatigiiffii oqaaseqartinniarsarigaluarpai.

Taakkuli soraarsitsinissamut siumut kalerriuteqarneq oqaaseqarfigerusunngilaat.