Kangerlussuarmi mittarfeqarfik nutartertariaqarpoq
Taamaalillutik Air Greenlandip nutarterisoqarnissaanik kissaataa taperserpaat.
Siunnersuisoqatigiit pisortaat oqarpoq, nutarterisoqarneratigut takornariat amerliartornissaat iluaquserneqassasoq mittarfiullu illutaasa inuit amerlasuut kiffartuussinnaanngikkai.
- Allanngortitsisoqartariaqarpoq, tassami angallattoqaleruttornerata nalaani ilaasunut Kangerlussuakkoortartunut mittarfeqarfik mikivallaalernikuuvoq, Siunnersuisoqatigiit pisortaat Thomas Rosenkrands oqarpoq, nangillunilu:
- Ilaasut Nuummukartartut eqqarsaatigalugit paasilluarsinnaavarput, Nuummi timmisartorsuarnut mittarfeqalernissaa kissaatigimmassuk, kisianni tamanna siunissami ungasinnerusumi pissaaq, ullumikkulli Kangerlussuarmut aqqusaartartut eqqarsaatigalugit atugassarititaasut pitsanngorsarneqartariaqarput, Thomas Rosenkrands oqarpoq.
