Kangerlussuarmi mittarfeqarfik allilerneqassaaq
Kangerlussuarmi mittarfeqarfiup mikivallaalerluni ullutsinni pissutsinut naleqqukkunnaarluinnarnera aqqusaartunut kipiluttunartarpoq, tassami
issiaviusinnaasut perusuersarfiillu ikippallaarput, taamatuttaarlu sutorniartarfik utaqqisarfillu mikivallaarlutik.
Mittarfeqarfimmi perusuersartarfiit tallimaannaapput, taakkunannga ataaseq innarluutilinnut atugassiaalluni. Sutorniartarfimmi inuit 156-it kiffartuunneqarsinnaapput, ullormulli agguaqatigiisillugu 17-eriaataat aqqusaartartut, igaffimmi pisortap oqaatigaa.
Kangerlusuup mittarfeqarfiani kiffartuunneqarnissamut, angallassinerullu patajaatsumik ingerlanneqarnissaanut pissutsit naammaginanngilluinnartut, Air Greenlandip pisortaata, Michael Binzerip nassuerutigaa, mittarfeqarfiulli allilerneqarnissaanut pilersaarutit suliarinnittussarsiorneqareermata iluarisimaarlugu.
Kangerlussuarmi takornariat tujormisinneqartarnerat avammut aaqqiivigiuminaappoq. Nunatsinni Takornariaqarnermi Inuussutissarsiornermilu Siunnersuisoqatigiit pisortaat, Thomas Rosenkrands oqarpoq misissuisarnerit takutikkaat misillerfigisaq ataaseq misigisanik nuannersunik aqqaneq marlunnik aatsaat nalimmarsarneqarsinnaasoq.
Mittarfiup pisortaa, Rita Müller oqarpoq mittarfiup allilerneqarnissaa aningaasaliiffigineqareersoq aappaagulu angallannerujussuaq nalliutsinnagu alliliineq naammassineqareersimassasoq neriuutigalugu.
