Kangerlussuarmi marraq qarmasissianngortippaat
Marraq 80 tonsi Kangerlussuarmiit Danmark-imut upernaaq nassiunneqartoq maanna qarmasissianut 16.000-inut suliarineqareerpoq.
Qarmasissiat Kalaallit Nunaata marraanik suliarineqartut, Danmarkimi aviisimi ullut tamaasa saqqummersartumit Jyske Vestkystenimi allaaserineqarpoq.
Nunatsinni inissialiornermi tamatigut qisuk cementilu atorneqartarput, tamannali allanngoriaannaavoq qarmasissiaq marrarmit nunatsinneersumik suliarineqartoq atorluarneqalissappat.
Issittumi teknologimik ineriartortitsivik, Center for Arktisk teknologi, Danmarkimi teknologimik Universitet kiisalu Sisimiuni Sanaartornermik ilinniarfik suleqatigiillutik qarmasissianik sanaartortitsipput. Qarmasissiat ikuallanneqarput Jyllandimi suliffeqarfimmit Petersen Tegl-imit, tassalu taakku qarmasissiat 16.000 ilusilersorlugillu ikuallappaat.
Kangerlussuarmi imak marraqartigaaq allaat Danmarkimi qarmasissiorfiit ukiuni 16-ini qarmasissiornissaannut naammattumik marraqarluni. Tassuminnga naatsorsuisuuvoq Danmarkimi Teknologimik Universiteti.
Qarmasissiornerulli saniatigut marraap allanut atorsinnaaneranik aamma misileraasoqarpoq, soorlu oqorsaatitut atorneqarsinnaanera misissorneqartoq. Marramineq kinguppaat qalipakuinik puisillu orsuanik akuneqarsimavoq ikuallanneqarlunilu. Misiliinerup inernerivai popcorniusannguit putuararpassuaqarnertik patsisigalugu oqorsaatitut atorneqarsinnasut.
Marriortoq Kangerlussuup marraanik misileraasimavortaaq, taassumalu saniatigut aamma marraap betonimik akullugu qanoq inneranik misileraasoqarluni.
Danmarkimi teknologimik Universitetimiit naliliisoqarpoq marraq betonilu akusaq ninngunerusumik pitsaanerusumillu betonimik pilersitsisartoq. Taamaalillunilu betoniliornermi cementimik sipaartoqarsinnaavoq marrarmik atuisoqarpat.
