Kangerlussuarmi innuttaasut naammagittaalliorput
Pingasunngormat Kangerlussuarmi innuttaasunik paasisitsiniaalluni ataatsimiisitsinerup ingerlanerani tusarnaartut arlallit akerliullutik aniasimapput.
Ataatsimiinnermi eqqissisimatitsinissami pilersaarutit, sermersuullu tungaanut aqqusinniornissaq eqqartorneqarput. Tusarnaartulli ilaasa inissaaleqineq, umiarsualiviup nutarternissaa, kuuffiit, kigutinullu tunngasunut suliniutit tusarusunnerusimavaat.
Aaqqissuisulli pilersaarutaareersut aallaavigalugit oqallitsitsinissaq aalajangiusimavaat, peqataasummi kommunalbestyrelsemeersut, nunaqarfimmi aqutsisuneersut namminersornerullutillu oqartussaneersut nassuiaanissaannut oqallisissiat aalajangerneqarnikooreermata.
Tusarnaartut naammagittaalliortut ilaata Tim Koop Jensen´ip uparuarpaa Sisimiut kommuneatali ukiut sisamat matuma siorna Kangerlussuaq oqartussaaffigilermagu kommunemut attaveqarniartarnerit ajornarnerulersimanerat.
Nunaqarfimmi aqutsisut siulittaasuata, kommunalbestyrelsemuttaaq ilaasortaasup Fritz Baumannip isornartorsiuineq pissusissamisuunnginnerarpaa, oqaatigalugulu innuttaasut isummaminnik saqqummiussinissaminnut periarfissaqareersut, erseqqissarluguli saaffiginniffissanut eqqortunut saaffiginnittoqartariaqarnera. Assersuutigalugu oqaatigaa umiarsualiveqarneq, kigutinullu tunngassuteqartut kommune´p suliassarinngikkai. Isumaqarnerarporlu innuttaasut sunniuteqarnerorusukkunik assersuutigalugu atuarfimmi siulersuisut suliniuteqarnerinut peqataanerusariaqartut.
