Timmisartoq Kangerlussuarmut ingerlaannarpoq, nalunaaqutaq 14:10 mippoq orsersoriarluni Københavnimut uterluni aallaqqippoq.Assi: KNR

Kangerlussuarmi inissaqartitsinnginneq – Air Greenlandip ilaasui Københavnimut utertinneqartut

Air Greenlandimi ilaasut 128-t siniffissaqartinniarlugit Københavnimiit nunatsinnukaassaraluarni uterteqqikkai.

Air Greenlandip timmisartoq attartugaa Jet Time 139-nik ilaasulik ippassaq Københavnimiit Narsarsualiarluni aallarpoq. Ilaasut 128-t Kangerlussuarmiit Københavnimut uterteqqinneqarput.

Kangerlussuarmi unnuiffissaqannginnera tamatuminnga peqquteqarpoq. Timmisartullu ilaasunik ulikkaartup timmisartup Kangerlussuarmi ussernerani ilaasui niusinnaanngillat.

Timmisartoq Jet Time Air Greenlandip attartugaraa.

Timmisartoq GL 785 Narsarsuarmut mittussaagaluarpoq, pujorpallaarnerali peqqutaalluni timmisartoq missinnaasimanngilaq.

- Timmisartoq Narsarsuarmi sivisuumik qulaavaarnissamut naammattumik orsussaqanngilaq. Taamaammat timmisartoq Islandimukassanersoq immaqaluunniit Kangerlussuarmukassanersoq piaartumik aalajangerneqartariaqarsimavoq, Air Greenlandip tusagassiisartua, Inga Dora G. Markussen KNR-imut oqarpoq.

Isumannaallisaavik ulikkaaqqasoq

Timmisartoq Kangerlussuarmut ingerlaannarpoq, nalunaaqutaq 14:10 mippoq orsersoriarluni Københavnimut uterluni aallaqqippoq.

Timmisartumi allami ilaasut aamma Kangerlussuarmut tikittut isumannaallisaasunit isumagineqarmata, Jet Timemik Narsarsualiaraluartut niugallarnissaannut isumannaallisaavimmi inissaqartitsisoqanngilaq.

Taannaannaanngilarlu Narsarsualiaraluartut Kangerlussuarmi unnuisinnissaannut aamma inissaqartinneqanngillat.

AAMMA ATUARUK Air Greenland: Vi ombooker folk fra Danmark for at undgå, at de skal sove i telte

Taamaammat timmisartup orsernerani timmisartumiiginnarput Københavnimullu uternissartik utaqqillugu.

Timmisartup orseriarluni ilaasut ippassaq Narsarsualiaatiinnarsinnaannginnamigit?

- Narsarsuarmi sila pitsanngorsimasuuppat timmisartoq uteqqissinnaasimanavianngikkaluarpoq. Tamanna timmisartumi aquttut timmisinnaanissaanut qasuersaarnissaannullu piffissaliussanut unioqqutitsinerussaaq. Kangerlussuarmilu taarsiisinnaasunik sulisussaateqarata, Inga Dora G. Markussen oqarpoq.

Sooruna timmisartumit niusinnaatitaanngitsut?

- Ippassaq piffissaqarnitsinnut tamanna periarfissaanngilaq.

Ilaasut 128-t timmisartumiiginnartitaasut

Ilaasut aqqanillit kujataanut angalanngitsut Kangerlussuarmut niusinneqarput - ilaasulli sinneri timmisartumiit anisinneqaratik Københavnimut utertinneqarput. 

Ilaasut nunatsinnut tallimanngorpat angalassapput.

Narsarsuarmili aamma unammillernartoqalerpoq. Timmisartorsuarmummi ilaasussat 107-it Jet Timemit timmisartumut ilaanissaminnut utaqqigaluarput, tikinngitsoorporli. Taakku suli Narsarsuarmiipput. Air Greenlandip oqarnera naapertorlugu taakkunannga 42-t aqagu aallassapput. Sinnerilu 65-it tallimanngorpamut utaqqisariaqassallutik.

- Ilaasut Københavnimut utertariaqartarnera siusinnerusukkut nalaattarnikuuarput. Kisianni Kangerlussuarmut missinnaasannginneq akuttusaqaaq, Inga Dora G. Markussen oqarpoq.

Aasaq manna angallanniarneq eqqarsaatigalugu Air Greenland ilungersunartorsiorpoq. Air Greenlandip ilaasui 1000-it missaanniittut juulip qiteqqunnerata missaani sumiiffinni arlalinni pujorpallaarnera peqqutigalugu eqqugaapput.

Taamani angalanermut billetsinik tuniniaaneq unitsinneqarallartariaqarneranik kinguneqarpoq.

Billetsinik tuniniaaneq juulip 18-iani ammaanneqaqqippoq.

Aggustili aallartittoq Kangerlussuarmiit ingerlariaqqinnaveertut amerlangaarmata ilaasorpassuit timersortarfimmi unnuisinneqartariaqarlutik.

Nunatsinnut angalaneq ajornakusoortoq kikkut tamarmik ilisimavaat. Akisussaassuseqanngitsumik billetsinik silap pissusia pissutigalugu unnuisariaqartussanut unnuiffissanit amerlanerusunik tunisaqarsimavisi? 

- Tamanna angallassisarnermi maani nalilersussavarput. Ukioq manna coronap ukiuni marlunni unammillernartoqartitsereernerata kingorna Kangerlussuarmi takornariarpassuupput. Nunarput takornariarfigineqarusuttunngorpoq, Inga Dora G. Markussen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl