Kangerlussuarmi ilinniartitsisut soraakaapput

Kangerlussuarmi atuarfimmi ajornartorsiuterpassuit peqqutaallutik ilinniartitsisuni arfineq-marluusunit pingasut ukiortaamiit soraarniuteqarput. Ilinniartitsisut allat marluk aamma soraarniuteqassanerlutik maanna nalilersuipput.

Meeqqat naalatsikkuminaattaramik atuartinniarnerat ajornakusoortorujussuusartoq ilinniartitsisunit oqaatigineqarpoq.

Atuarfimmi ajornartorsiutit sumiginnaanermik aallaaveqarpoq.

- Meeqqat ilaat angajoqqaamik akuerisaannik pissuteqartartut atuartinniarlugit ajornakusoortorujussuusarput aamma angajoqqaajusut suleqatiginissaat inornartarpoq, ilinniartitsisut ilaat aterminik taaseqqusinngitsoq soraarniuteqarnissaminnillu eqqarsaasersortut aappaa taama oqarpoq.

Atuarfik siorna uppernassakkulli ilinniartitsisunik amigaateqarnini pillugu atuartut 76-iusut tiimelærerinit atuartinneqarsimallutik. Ukiaq manna ilinniartitsisut nutaat pingasut atorfinitsinneqarput, taakkuuppulli maanna aallarniarlutik aalajangertut.

- Allamik periarfissaqanngilaq, ilinniartitsisutut nukissaarunnarpoq, taama ilinniartitsisut ilaat oqarpoq.

Atuarfik ullut pingajussaat ullumikkut matoqqavoq, Sisimiut Kommuneanit aallartitat arlaqartut atuarfimmi ilinniartitsisunik arfineq-marluusunik tiimelærerinillu pingasunik ataatsimeeqatiginninnerat pissutaalluni.

Sisimiut Kommuneanni atuarfeqarfinnut pisortaagallartoq, Lars Jørgen Kleist ippassaq radioaviisimut oqarpoq, ajornartorsiutit qaangerneqarnissaat qularinagu ilinniartitsisullu nuannaajallannerarpai. Taamatulli oqarnera radioaviisip ullaap tungaani paasisai naapertorlugit tunngavissaqanngillat. Ilinniartitsisoq oqatigineqartoq oqarpoq naak aallartitanik tikeraarneqaraluarlutik ilinniartitsisut suli naammagisimaarinninngitsut.

- Pikkorissarnissap pilersaarusiorneqarnerani peqataatinneqarsimanngilagut, ajornartorsiutillu taama artornartigisut aaqqinneqarsinnaanngillat angajoqqaat ilaatinnagit, ilinniartitsisoq oqarpoq.

Sisimiut kommuneanni borgmester Hermann Berthelsen ilinniartitsisunit pineqartunit soraarniutit takoqqaartinnagit oqaaseqarusunngilaq.