Kangerlussuarmi ikaartarfiit matuneqarput
- Kuussuup ernga piffissami kingullermi nalinginnaasumit qaffanneruvoq, aatsaat taama qaffatsigaluni. Oqaluttuunneqarpunga imeq 1984-imi aamma qaffannerpaaffeqarsimasoq, maannalu minnerpaamik meterimik ataatsimik taamanikkornit qaffanneruvoq.
- Tassalu supisorsuuvoq, maliliortorsuulluni ikaartarfik aqqusaatarisarpaa, Qeqqata Kommuniata Kangerlussuarmi ingerlatsinermut akisussaasuutitaa, Fritz Baumann Petersen, oqaluttuarpoq.
Kuussuarmi erngup sapusiaq aqqusinerlu maanna mangiartulersimavaa, taakkua nakkaateriaannanngortillugit.
Taamaammat tamaani ujarassuarnik betoniminersuarnillu ippassarli assiaqutsersuilersimapput. Unnuarlu pingasup tungaanut sulisoqaraluartoq, iluaqutaavinngilaq.
- Imeq taama sarfartillugu ujarassuarnik 1 meterisut silissusilinnilluunnit nakkartitsigaluaraangatta, kuugusaaginnartarput, Fritz Baumann Peteersen oqarpoq.
Kuussuup supinerata Kangerlussuarmi ulluinnaat allanngortilluinnarpai. Ikaartarfiit nalinginnaasumik angallattunut maanna matoqapput, taamaalilluni nunaqarfiup kujasinnerusortaanut ikaarnissaq ajornarluni.
Tassalu mittarfiup teknikkikkut atortorissaarutaanunut, soorlu radareqarfimmut, ikaarnissaq ajornarpoq, soorluttaaq neriniartarfik takornariat ornigarluartagaat, Roklubben, tikitassaanngitsoq.
Tassalu takornariat 85-it tassunga ippassaq neriartornissaat taamaatiinnarneqarpoq.
Fritz Baumann Petersen isumaqarpoq, kuussuup taama supitigineranut silap kiannera Sermersuup aakkiartorneruneranik kinguneqartoq, patsisaasoq:
- Eqqumeequtaa tassa, erngup qaffassimanera nalunaaquttap akunnerini aqqaneq marlungajanni allanngorneq ajorami. Sermersuarmiit imeq kuuttoq apeqqutaalluni, kuup qaffattarnera nalinginnaasumik allanngorartaraluarpoq. Maannakkorpiarli kuuk qaffannerpaaffigisimasaminiit qaffanneroqqaannavippoq, Fritz Baumann Petersen oqaluttuarpoq
Kuussuup aamma nunaqarfiup kujasinnerusortaani imermut innaallagissamullu aqqutai qarsuteqqavai.
- Atortunik ajoqusertoqarsinnaaneranut upalungaarsimavugut, Mittarfeqarfiit nukissiorfianni maskinmesteri, Allan Sørensen Radioavisimut oqarpoq.
Sermersuarmi kianneruleriartormat kuussuaq ullup unnuallu tulliuttup ingerlanerani suli qarsutsisaqattaassasoq, taassuma naatsorsuutigaa.
