Kangerlussuarmi efterskolimi atuartut pingajoraarterutaat uniinnarput
Ilinniartut amerlavallaarnerarneqarput, efterskolilu aallartimmat naammattunik nerisassaqarsimanani, ilinniartullu amerlanerit perlilerlutik innartariaqartarsimallutik.
Ininut matuersaatit aallaaqqaammut amigarsimapput, aningaasanik, oqarasuaatinik angallattakkanik atisanillu tillinniartoqartarnerannik kinguneqarluni.
Efterskolertaamik viceforstanderip Tim Hansenip ilinniarnerminnik unitsitsiinnartut paatsiiveqanngitsuunerarpai. Ilinniartut arfineq-marluk angerlartiinnarneqarsimapput, unittullu sinneri angerlarsernertik, nerisat pillugit naammagittaalliuuteqarnertik initillu pissutigalugit uniinnarsimanerarlugit:
- Isumaqarpunga kalaallit inuusuttai ajornaatsuinnaanngitsut. Amerlasuut paatsiiveqanngillat. Attatiinnarnissaat ajornakusoortorujussuuvoq pisariaqartitamillu aqunneqartorujussuupput. Ilinniartitsineq nuannarinngikkaangamikku taava ingerlaannartarput, pisortap tullia Tim Hansen oqarpoq.