Kangerlussuarmi atuarfik nunatsinni pitsaanerpaasoq

2017-imi misilitsinnerit tunngavigalugit Qinnguata Atuarfia nunatsinni atuarfiit pitsaanersaattut inissisimavoq, Qeqqatalu Kommuniani kommunalbestyrelsip tamanna nalliuttorsiutigivaa.

Qinnguata Atuarfiani naammassisut pinngortitalerinermi, matematikkimi qallunaatoornermilu allattariarsornermi pitsaanerpaamik karakteerillit sisamaanni inissipput.

Kalaallisoornermi suli angusarissaarnerupput, Qinnguatami Atuarfiani naammassisut nunatsinni karakterini pitsaanerit pingajuattut inissipput, tuluttoornermilu misilitsinnerni nunatsinni angusarissaarnerpaallutik.

Nunatsinni atuarfiit tamarmik misilitsissutigisartagaanni, agguaqatigiissilugu qaffasinnerpaat sisamaattut inissiput.

Qinnguata Atuarfiani atuartut naammassisut angusarissaarnerat, Qeqqata Kommuniani Ilinniaritaanermut, Peqqinermut, Sunngiffimi sammisanut Kultureqarnermullu ataatsimiititaliami siulittaasoq Evelyn Frederiksenip tulluusimaarutigai:

- Qeqqata Kommuniani oqaatsinik ilinniartitsineq ukkataraarput aammalu tuluttoorneq 1.klassimit aallartittalernikuullugu. Kisianni kalaallisoornermi tuluttoornermilu pikkorinnissap akornanni imminut akerleriissutaasinnaasunik takusaqarsinnaanngilagut. Tamanna Qinnguata Atuarfiata takutippaa, Evelyn Frederiksen oqarpoq.

Qinnguata Atuaffia atuarfiup angerlarsimaffiullu akornanni nukittuutut suleqatigiinnerat, Qeqqata Kommuniani borgmesterip Malik Berthelsenip nuannaarutigaa:

- Nalaatsorneriinnaanngilaq 2017-imi Kangerlussuarmi atuarfik nunatsinni pitsaanerpaamik karaktereqartitsinera, borgmesteri oqarpoq.