Kangerlussuarmi akileraarutitaqanngitsunik pisisoqaqqusaanngilaq

Kastrup-imi mittarfissuarmi ajornartorsiortoqarmat Kangerlussuarmi Narsarsuarmilu ilaasussat ingerlaqqittussat utaqqisinneqartariaqarput.

EU-miit piumasarineqarmat isumannaallisaaneq sukannernerulissasoq, feeriarsimasut niiveqateqariartorlutillu angalasut pisarnermit sivisunerusumik utaqqisinneqarput.

Taamatut EU-p naalakkiuteqarnera nunatsinnut aamma sunniuppoq, nunatsinnimi aamma piumasaqaatit qaffattariaqalermata.

Ullumikkullu timmisartumik ingerlaqqittussat Kangerlussuarmiittut akunnerit marluk utaqqisinneqarput.

- Taamatut aaqqiisoqarnerata ajoqutituaraa angalasut Kangerlussuarmut tikinnerminni nioqqutinik akileraarutitaqanngitsunik pisisinnaannginnerat, taama oqarpoq nunatsinni mittarfeqarfiit pisortaat Jesper Juhl.

Tamanna tunngaveqarpoq, tikittut aallartussallu imminnut naapeqqusaannginnerannik, taamaammallu tikittut akileraarutitaqanngitsunik pisiniarfimmut iseqqusaanngillat.

Jesper Juhl-ip oqaatigisinnaannginnerarpaa taamatut isumannaallisaaniartoqarnera qanoq sivisutigisumik ingerlajumaarnersoq.

- Apeqqutaavoq EU-p Kastrup-imi mittarfimmut tunngatillugu piumasaaqaatini qanoq sivisutigisumik ingerlanniarnerai, Jesper Juhl oqarpoq.

Air Greenlandip ingerlatsiviata pisortaata Flemming Knudsenip ilisimatitsissutigaa, angalasut aallariartoqqusaalerpata timmisartumullu ikippata allannguutit pillugit ilisimatinneqarumaartut.