Kangerlussuaq Tourism akiliisinnaajunnaarpoq
Naak Greenland Tourismimit aningaasatigut tapersersorneqaraluarluni, Kangerlussuaq Tourismip akiitsui maanna 1,5 millionit koruuninik amerlassuseqalersimapput. Akiitsoqarfiilli tamarmik nalunaareernerisigut akiitsut amerlanerunissaat naatsorsuutigineqarpoq.
Kangerlussuaq Tourism 2001-imili akiliisinnaajunnaarluni uningajakkaluarpoq, taamanili piffissaq kingulleq atorlugu aningaasaliisumit naatsorsuuserisumillu Jens Lauersenimit annaanneqarluni. Taassuma taamaalilluni takornarianik sullissivik pisiaraa, taamalu taamanili nuliani peqatigalugu ingerlatilerlugu.
Suliffeqarfiup Kangerlussuaq Tourismip ataani inissisimasup Grønlands-Ekspertenip Københavnimiittup akiliisinnaajunnaarnermi ilaanera suli paasinarsinngilaq.
Tamatuma saniatigut Kangerlussuaq Tourismip Norgimiut umiarsuaatileqatigiiffiata Hurtigrutenip sullissineranut ilaagaluarpoq. Hurtigruten aasaanerani Framimik sinerissami illoqarfinnut angallassisaraluarpoq, taamatulli sullissineq World of Greenlandimit maanna isumagineqalissaaq, Travel People taama allaaserisaqarnerarlugu Sermitsiap nittartagaanit issuarneqarpoq.