Kangerlussuaq mittarfeqarfiuinnassaaq

Attaveqaqatigiinnermut Naalakkersuisoq  Sermitsiap nittartagaanut ima oqarpoq:

- Kangerlussuup mittarfeqarfittut ataannarsinnaanissaa ernummatigineqartariaqanngilaq.

- Imermik innaallagissamillu pilersuineq ajoquserneqanngillat aamma ajoquserneqannginnissaat naatsorsuutigaarput. Mittarfeqarfiit ajornartoornermi iliuusissatut pilersaaruteqarput, taamaalilluni innaallagissamik pilersuinerup ingerlatiinnarneqarnissaa isumannaarniarneqarluni, Naalakkersuisuni ilaasortaq nittartakkamut oqarpoq.

Sermersuup aanneranit kuussuup qarsutsinerujussuata kinguneranik Nunatsinni mittarfiit pingaarnersaanut sunniuteqarnissaa arlalinnit ernumanartinneqaleraluarpoq. Jens B. Fredriksenilli pissutsit takoreerlugit eqqissiimineruvoq.

- Ajoqusernerit unamminartutut isikkoqarput. Erngup qaffannera appaqqilluni pissusissamisooqqilerpat, ikaartarfiup ajoquserneri takuneqarsinnaalissapput, taanna oqarpoq.

Kangerlussuarmi pissutsit oqaluuseriniarlugit taassuma Qeqqata Kommuniani borgmesteri Hermann Berthelsen, nunaqarfiup aqutsisui aamma Mittarfeqarfiit pisortaat Jens Lauridsen´maanna ataatsimeeqatigileruttorpai.

Qarsutsinerup nalaani issariarnermi ataatsimi imeq 3,5 million liiteri kuugussaasarpoq. Kuuk kuunnerpaagami 1984-imi issariarnermut ataatsimut imermik 2 million liiterimik taamani kuugussisarpoq.