Kangerlussuaq isumaqatigiissummut ilanngulli
Pisoq pillugu illuatungeriit oqaaseqarusunngillat. Tusatsiakkat naapertorlugit Kangerlussuarmi akileraaruteqanngitsumik pisiniarfeqarnerup unitsineqarsimasimanera akimmisaarfiuvoq.
Nioqqutinik akileraaruteqanngitsunik Naalakkersuisut eqqussueqqusiunnaarnerat KNI´p aningaasaqarniarneranut annertuumik annaasaqaataavoq, taamaattumik nunaqarfiup Kangerlussuup nunaqarfiit allat assigalugit nioqqutissanik pilersorneqarnera qulakkeerneqassappat, KNI nutaamik kiffartuussinissamik isumaqatigiissuteqarnissamik kissaateqarpoq.
Namminersorlutik Oqartussat KNI´mik kiffartuussinissamut isumaqatigiissutaani aningaasaliissutigineqartut ikilisinneqarnissaannik Namminersorlutik oqartussat aarlerisaaruteqarput, nunaqarfiup Kangerlussuup kiffartuunneqarneranut 37 millioner koruunit siorna aningaasaliissutigineqarput.
Isumaqatiginniarnerup sivitsornera pissutigalugu, kiffartuussinissamut isumaqatigiissut ukiup nikinnerani atorunnaartoq Naalakkersuisut sivitsorneqartariaqarsimavaat, nutaamik isumaqatigissusiortoqarani Naalakkersuisut aningaasaqarnermut ataatsimiititaliamut immikkut ittumik aningaasaliinissamut 9,25 millioner koruuninik maanna qinnuteqarput, Kangerlussuup qaammatini pingasuni siullerni pilersorneqarnissaa qulakkeerniarlugu.
Naalakkersuisut qinnuteqaataat aningaasaqarnermut ataatsimiititaliamit akuerineqarpoq, tassalu KNI´mut ukiumut aningaasaliissutigineqartut 37 millioner koruuniusut, isumaqatigiissut siorna atuuttoq malillugu sisamararterutaat akuerineqarlutik.