Kangerlussuaq issinnerpaatut uuttorneqarpoq
Kangerlussuarmi sapaatiummat februaarip qulinganni DMI naapertorlugu februaarimi aatsaat taamak issitsigisimavoq, tassa 46,8 gradinik ississimagami.
Allattoq Louise M. Kleemann
Taamaalilluni februaarimi issinnerpaatut nalunaarneqarsimasoq 46,4 gradiusoq qaangerneqarpoq.
Taamaattorli sapaatiummat issinnerujussua Kangerlussuarmut nunattaluunniit sinneranut rekordiliinerunngilaq.
DMI naapertorlugu Kangerlussuarmi issinnerpaagami 47,2 gradinik issippoq, tassa 1983-imi januaarip sisamaanni.
Nunatsinni sermersuup avataani issinnerpaaq uuttorneqarsimasoq 52,1 gradiuvoq, Nunattalu avannaarpiarsuani Hall Landimi uuttorneqarsimalluni.
Sermersuup qaffasinnerpaaffiani – 3000 meterisut qaaffasitsigisumi Summit-imi 2002-mi februaarip 21-anni 63,3 gradinik ississimavoq.