Nuup Ilulissallu mittarfii tallineqarpata Kangerlussuup mittarfia annikinnerusumik atorneqalissaaq. Taamaakkaluartoq Kangerlussuup siunissami immikkuullarissumik takornariaqartitsinermik ineriartortitsivigineqarsinnaammat angallannermut naalakkersuisup, Jens Napaattuup isumalluarfigaa: - Kialluunniit nunatsinnik ilisimaarinnittup aamma malinnaasup takusinnaavaa Kangerlussuaq annertoorujussuarmik periarfissaqartoq. Umimmaqarfiorujussuanngornikuuvoq, tuttoqarfiuvoq, takornariaqarnernikkut periarfissat assigiinngitsorparujussuit ingerlanneqarput aamma allaat biilinik misileraaffinnik ingerlatsisoqarnikuuvoq, nunatsinnut aningaasarsiornermi iluaqutaasumik. Taamaattumik Kangerlussuup toqqaannartumik inuutissarsiornikkut annertuumik nunatsinnut tunniussaqarsinnaanera eqqarsaatigigaanni takorlooruminaatsorujussuuvoq Kangerlussuaqanngitsumik nunarput siunissaqarnera, Angallannermut naalakkersuisoq Jens Napaattooq oqarpoq.
Nunatsinnut angalasinnaanissamut periarfissat amerlasinnaanissaat, kiisalu nunatta iluani angallannermi akikinnerusumik angalasoqarsinnaanissaa pillugu angallannermut naalakkersuisup upperilluinnarpaa atlantikoq ikaarlugu angallanermi mittarfiit sisamaasinnaanissaat. Mittarfiít sisamat tassaapput Pituffik, Ilulissat, Nuuk kiisalu Narsarsuaq.
Angallannermut naalakkersuisoq aqagu unnukkut Kangerlussualiarluni innuttaasut ataatsimeeqatigissavai.
