Kangerlussuaq akisuallaalissaaq

Ilulissani Nuummilu mittarfiit tallineqarpata Kangerlussuarmi mittarfiup atorneqarnera killeqarnerulerluni ingerlanneqarnera akisuallaalissaaq.

Ilulissani Nuummilu mittarfiit 1799 meterinut tallineqarnerpata Kangerlussuarmi mittarfiup atorneqarsinnanera killeqalissaaq. Kangerlussuarmi mittarfik ataannassappat Nunatsinnut aningaasatigut artukkiissasoq Københavns handelskolemi aningaasarsiornermik ilisimatuup Lars Lund-ip nalilerpaa.

Nunatsinni mittarfeqarneq eqqarsaatigalugu periarfissat assigiinngitsut tallimat pitsaaqutigisinnaasai ajoqutigisinnaasaalu misissorsimavai.

Ilulissani Nuummilu mittarfiit 1799 miiterinut tallineqarpata inuiaqatigiit sipaarsinnaasaat katillugit 1,3 mia.kr.-niupput.

Kangerlussuarmi mittarfiup atorfissaqartinneqarnera annikinneruleraluartoq ammatiinnarneqarpat inuiaqatigiinnut aningaasartuut pisariaqanngitsoq 1,8 mia.kr.-niussasoq Lars Lund-ip naatsorsorsimasaani oqaatigineqarpoq.

Aningaasarsiornermik ilisimatuup Lars Lund-ip nalunaarusiamini Kangerlussuarmi mittarfiup atorunnaarsineqarnissaa periarfissat ilaattut taasimavaa, taarsiullugu mittarfik Island-mi Keflavik-miittoq atorneqalersinnaanerarpaa.