Kangerlussarmi pisut iliuuseqarfigineqalerput

Kangerlussuarmi angajoqqaat atuarfimmi ajornartorsiutit qanoq aaqqiffigineqassanersut piaartumik innuttaasunik ataatsimiisitsisoqalerpat ilisimatinneqassapput, taama Sisimiut kommuneanni atuarfeqarfinnut pisortaagallartoq, Lars-Jørgen Kleist ulluni pingasuni ilinniartitsisunik kommunimiillu aallartitanik ataatsimiisitsereerluni oqarpoq.

- Pilersaarusiussalluta isumaqatigiippugut. Qanimut suleqatigiinnissaq maannakkullu ilinniartitsisutut atorfeqartut pigiinnarnissaat siunertaraarput, Lars-Jørgen Kleist taama oqarpoq.

Atuarfeqarfimmi pisortaagallartup ilisimatitsissutigaa ilinniartitsisunit arfineq-marluusunit marluk soraarniarnertik aalajangiussimagaat, taassumalu saniatigut ”ilinniartitsisoqarluni misileeqqikkusuttunik”.

Ilinniartitsut atugaat atuartitsinermilu periarfissat oqinnerusut atuutilersinnaaqqullugit pilersaarusiornermi ilanngunneqassapput. Soorlu assersuutigalugu klassimi ataatsimi ilinniartitsisut marluk atuartitsisalissapput immikkullu atuartunik oqaloqatiginnittartussanik ilinniartitsoqassalluni.

Taakku saniatigut politiit inunnillu isumaginnittoqarfimmi sulisut peqataaffigisaannik suleqatigiisitaliortoqassalluni, minnerunngitsumillu sunngiffimmi sammisassaqartitsiviit amerlanerit pilersinneqassapput kiisalu atuarfiup nalinginnaasup avataatigut atuartitsineq periarfissarsiuunneqassalluni.

Atuarfik 76-inik atuartoqarpoq, taakkunannga amerlasuut inuttut ajornartorsiuteqartuunertik peqqutigalugu sakkortuumik periuseqartarput.