Kangerluarsunnguamit Nuummut 200-t arpaqataapput

- Kiannera arpattunut ilungersunarpoq, taamaattorli arpatsitsinerput iluatsilluartorujussuuvoq, arpatsitsinermik aaqqissuussisunit Helene Berthelsen, arpannerup kinguninngua Sermitsiap nittartagaanut oqarpoq.

Peqataasussat ippassaq ullaakkut Nuup kujatinnguanut umiatsiamik Kangerluarsunngualiaanneqarput, tassanngaanniimmi 20 aamma 35 kilometerinik isorartussusilimmut arpattussat aallartussaammata. Aamma qasujaallisaatigalugu pisuinnartussat tassanngaanniit aallartussaammata.

35 kilometerinik isorartussusilimmi angutini Kim Godtfredsen ajugaavoq, atorlugit 4 tiimit 6 minutsit 40 sekuntillu. Angusani taanna 2005-imi rekordiminit 20 minutsinik arriinnerulluni arpappaa. Tulliulluni apuuppoq Jens Bjerre, siorna ajugaasoq, ukiormannalu tassa normu 2-usoq. Frederik Lundblad normu 3-nngorpoq.

Arpaffimmut isorartunermut arnaq ataasiinnaq peqataavoq, tassaasoq Miiti Lynge, taassumalu atorpai 5 tiimit 33 minutsillu.