Kangerluarsunnguami nuna ikuallappoq
Nuummiit eqalunniaq politiinut ippassaq ullup-qeqqa qaangilaaraa kalerriivoq Kangerluarsunnguami nuna ikuallattoq.
Nuummi politeeqarfimmiit Frederik Heilmann ilisimatitsivoq Kangerluarsunnguup qinnguani nuna annertooq ikuallattoq, qatserisartullu arfinillit Kangerluarsunngualiarsimasut.
Allattoq Aaqqissuisoqarfik / Redaktionen
Ikuallattoq ima annertutigisimavoq qatserisartut qatserutaasa sullulittai ikuallattumut inorsarsimallutik, immamiit ungasinneq angusinnaasimanagu. Taaamaammat ikuallattup ilaannaa qamissimavaat, qatserisartullu ullaaq-manna Kangerlaursunnguamut misissuiartoqqittariaqarsimapput, qatsinnerusumi ikuallattoq qamissimanersoq alakkarterlugu.
- Nunap panernerujussua pissutigalugu ikuallanneq siaruaatipallassimavoq, Frederik Heilmann nassuiaavoq.
Piaaraluni ikuallatsitsoqarsimanersoq, nunaluunniit qanoq ililluni ikuallalersimanersoq politiit oqaatigisinnaanngikkallarpaat.