Kangerluarsuk Ungallermi ikuallanneq kinguneqapiluppoq

Sisimiut avannaani Kangerluarsuk Ungallermi erngup nukissiorfissami tallimanngormat ikuallattoqarnera kinguneqapiluppoq, ullormulli tunniussisarnissamut sunniunnavianngitsoq, suliamik aqutsisoq Istak Grønlandimilu pisortaq Gudmundur Thordarson oqarpoq.
Allattoq Mads Lynge
septembarip 08-at 2008 05:12

Innaallagissiorfik, sannavik kingoraartissaasivillu nunguillutik tallimanngormat ullaakkut ikuallapput. Kinguneraalu Slovakiamiut sulluliortutut sulisut 23-t angerlarartikkallarneqarnerat. Suliassaallu piareerpata uterumaartut, pisortaq oqarpoq.

Sannavik innaallagissiorfillu maanna nappaqqinniarlugit suliat aallartereerput.

Erngup nukissiorfiliornermut atatillugu sulisorineqartut sinneri 90-it betoninik sanaartortut, allaffimmiut nerisarfimmilu sulisut suliaat ingerlaannarput.

- Nukissiorfiit Sisimiunilu suliffeqarfiit innaallagissiuutinik ajunngisaarlutik atukkikkallarpaatigut. Islandimi suleqatigut innaallagissiuutit taartissaannik aamma sannatinik sullisissatsinnillu nassiussuillutik aallartereerput, Gudmundur Thordarson nassuiaavoq.

Ikuallattoorneq erngup nukissiorfiliornermut maannakkorpiaq kinguaattoortitsilaarpoq.

- Kisianni engup nukissiorfiup maajimi 2010-mi tunniunneqarnissaanut tunngatillugu kinguaattoortitsissanngilaq, pisortaq oqarpoq.

Ikuallannermi innaallagissiuutit ajoquteqarnerannik pissuteqarsorineqartumi inunnik ajoqusertoqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq