Kangaatsiap nunaqarfimmiui kiisami atualerput

Kangaatsiap kommuneani meeqqat atuartut nunaqarfinneersut arfineq-pingasut, 10.klassemi anginerni atualertussat, inissaqartinneqanngeqqaaraluarsinnarlutik, kingusinaaraluarlutik ataasinngorpat atualissapput. inuusuttuaqqap inissaqartinneqalersup atualernissani iluarisimaarpaa.

- Nuanneq, taamatut periarfissaqalerluni. Angajoqqaakka qimakkaluarlugit ajunngilaq, aammami nunaqarfipput qaneqaaq, Atuartoq Kangaatsiami atuarfimmi inissaqalersoq, Juaannguaq Steenholdt oqarpoq. Kangaatsiami atuarfiup pisortaa Louis Petersen oqarpoq, Kangaatsiami atualersussat nunaqarfinneersut kinguaattuulaarsimaneri pillugit immikkut ittumik atuartitsinissamik aaqqissuussisoqarsimasoq.

Atuartut ullut 14-it sioqqullugit piareersarlugit aallartissimavagut, ilaatigut suliffimmi misiliinikkut, aammalu ullaakkut itiaartarnissamik sungiusarnikkut. Aamma Kangaatsiap kommuneatalu paaseqatigiinnerput qujanarpoq, meeqqallu atuarlersinnaaneri isumannaarmat toqqissiallannaqaaq, Kangaatsiami atuarfiup pisortaa Louis Petersen oqarpoq.

Kangaatsiami borgmesterip tullersortaa Ole Abrahamsen oqarpoq immikkut aningaasaliinissaq pisariaqarsimasoq.

- Taakkuullini pitsaassaqaaq, aamma atuartut uniinnarnatik atuarissamut kajungernerat ikorfartorneqassagami. Kingusikkaluartumillu atuartut atualernissaat aaqqinneqarpoq, Ole Abrahamsen Kangaatsiap kommuneani borgmesterimut tullersortaasoq oqarpoq.

Meeqqap ataatsip atuarnera 65.000 kr.-nik akeqassaaq, tassanilu Kangaatsiap kommunea immikkut aningaasaliilluni aaqqiissuteqarpoq.