Kangaatsiap nunaqarfiini atuartut atuartinneqannginnerat unioqqutitsineruvoq

Kangaatsiap pigisaani Niaqornaarsummiu Juaanguaq Steenholdt 15 -inik ukioqartoq ullumikkut qaammatini kingullerni atuaqqissanerluni nalunaarfigitinnissaminut utaqqisimalluni ullumikkut nalunaarfigineqarpoq Kangaatsiap atuarfiani 10.klassimi atuarsinnalluni.

Juaannguaq Kangaatsiap Kommuneani aningaassaqannginneq pissutigalugu qaammatini kingullerni atuarusukkaluarluni atuartinneqanngilaq.

Juaanguulli augustusimili atualersinnaanissi pisinnaatitaaffigigaluarpaa.

Ilinniartitaanermi Pisortaqarfimmi KIIIP-imi atorfilik Flemming Horstfeldt oqarpoq Kangaatsiap Kommuneani nunaqarfimmiut qulit atuarsinnaanerminnik mattunneqarsimanerat inatsisinik unioqqutitsinerusoq:

-Atuartut inatsit malillugu aturtinneqassapput atuarnissartik kissaatigippaassuk.

Atuartitaanermut peqqussut malillugu atuartut aalajangersimasunik tiiminik ullunillu atuartitaanissaminnut pisinnaatitaaffeqarput, aamma atuarfik nakkutilliisussaatitaalluni atuartut atuartinneqarnerannut. Kommunip pisuussaffigivaa atuarfiup nakkutilliinera ingerlanneqarnersoq.

Atuartoq atuarnissaminut kissaateqarpat atuarfiup atuartoq angerlartiinnarsinnaanngilaa oqarluni akissaqannginnatta atuarsinnaanngilatit, Flemming Horsfeldt nassuiaavoq.

Flemming Horstfeldt aperaarput Kommunit nakkutillisussaatitaanerat nakkutigineqanersoq, akivorlu:

- Aap, tassa uanga tamanna suliassaraara, taamaattumik aamma allakkatigut Kangaatsiap kommuneanut saaffiginninniarpugut Kommunip nakkutilliisussaatitaanerminut iliuutsit atorneqartut peqqussutit malillugit ingerlanneqaraat qulakkeerniarlugu.

Flemming Horstfeldtip erseqqissatigaa atuartut marluk aappaagu aatsaat atualertussanngortut maanna aamma atuartinneqarnissaminnut pisinnaatitaaffeqartut.

Kommunit bloktiskudiniit aningaasanik tunineqartarput atuartut atuartitaanerat qulakkeerneqassammat.

Bloktilskudit kommuninut tunniunneqartussat annertussusissaat Namminersornerullutik Oqartussat KANOKUKA-llu akornanni aalajangerneqartarpoq.