Kangaatsiami timersortarfik nutaaq sannarlutaammat atorneqarsinnaanngilaq

juulip 19-at 2005 17:14

Kangaatsiap kommuneani innuttaasut ukiuni arlalinni timersortarfittaarnissaminnik utaqqikatareerlutik kiisami siorna timersortarfittaaramik sannarlutaangaarmat piffissap annersaa timersortarfik pinnersaataaginnarpoq.

Kangaatsiap kommuneani timersortarfiup naqqa timersortunik arsarmillu atorneqarpiarneq ajorpoq, siornali timersortarfeeraq qilanaarisaq pigineqalerami piffissap annersaa naqqani qattat arlallit inissinneqarsimasut takussaanerusimagamik.

Ukiup ingerlanerani timersortarfimmi unamminissaraluit siunnersuisartut sanaartortullu akornganni ingerlanneqarnerusimapput.

Siunnersuisartut Masanti-kut isumaqaramik Permagreen-ip sannarlunneratigut timersortarfeeqqap qalia ussiitsuusoq. Permagreenikullu isumaqarlutik Masanti-kut titartaanerlunneratigut timersortarfeeqqap qalia kuuginnartutut suliaasoq.

Kangaatsiap kommunea unamminermut akuliunniartaraluarpoq timersortarfeeraq sukkanerpaamik innuttaasumi timersorlutik unammiuaarnermut atulerniassammassuk.

Namminersornerullutillu Oqartussat akuliuppaat.

Suliffeqarfiit taakkua marluk pisuusussarsiorlutik unamminerat imaaliallaannaq inaarsinnaannginnamikku peqatigiiffitsik Grønlands Arbejdsgiverforening ikiortigalugu avataaneersunik naliliisussanik toqqaatitsisoqarpoq.

Upernaarlu majip ingerlanerani suliffeqarfiit avataaneersut Kangaatsiamut misissuiartortitaapput.

Taakkua nalunaarusiaat naammassereerpoq inaarutaasumillu naliliineq amigaataasoq Grønlands Arbejdsgiver foreningimi inatsisileritooq Klaus Klausen oqarpoq.

Kangaatsiap timersortarfeeraa qanoq aaqqinneqassanersoq aqqissorneqarneralu qanoq akeqassanersoq augustip aallartinnerani aatsaat paasinarsissasoq Klaus Klausen oqarpoq.